Den marco di dia 20 di april e cual activistanan y hopi hende pro-cannabis ta celebra e fecha aki 4:20, partido RED a trece dilanti cu e meta cu nan tabatin pa logra e legalisacion y descriminalisacion di cannabis no a cumpli.

Ricardo Croes parlamentario a señala cu el a presenta e mocion pa descriminalisacion pero cu el a wordo boicotia di parti di e mesun coalicion aunke nan a firma cu nan lo cumpli cune.

Asina mes, el a bisa cu tambe a presenta un mocion pa para e drug test cu no ta corecto pa cu cannabis y cu a wordo boicotia pa asina por inclui tur agricultor local den industria aki, pero e no por a logra y cu na final segun Croes a declara cu minister demisionario di Salud Dangui Oduber a bisa cu mas di 70 compania a mustra interes pa e industria aki.

El a gradici na su votadonan cu “a confia cu a lo menos nos por a hiba e pelea aki riba nivel di parlamento y riba nivel di gobierno” el a comenta.

Tambe el a dirigi algun palabranan na minister Oduber na unda el a sigura cu Oduber no a cumpli y cu a gaña Croes cu tin pruebanan di cuanto biaha el a pospone e famoso rueda di prensa cu nan mester a haci pa por papia na e pueblo over e dia cu lo presenta su ley di legalisacion.

“Mi tin Whatsapp di mas cu dos aña con mi ta wordo priminti ki dia e ley ta yega parlamento, anto mi tin pensa di haci tur cos conoci, pa boso nan por mira e manipulacion cu mi ta biba y hopi hende a kere cu Ricardo no a cumpli”, el a enfatisa.

Segun Croes, e berdad ta cu e unico persona cu a cumpli te aworaki ta su persona, awe 20 di april ta un dia importante pa nan na unda ta un dia cu ta wordo celebra na nivel internacional.

Di su parti, Kinsasha Thielman presidente di e partido aki a duna un pabien na tur persona cu ta kere den e potencial cu e mata di cannabis tin den hopi aspecto den comunidad, pa su persona, spiritualmente, medicamente, economicamente y pa medio ambiente tambe.

“A pesar cu e lucha tabata dificil te cu awor y cu bo ta carga ‘e cachonan’ na un manera di bisa, mi ta contento cu nos ta keda fuerte y cu nos a persevera, aunke nos no ta mucho leu di loke nos ta desea y premira nos por sinti cu e lucha ta bayendo dilanti”, Thielman a manifesta.

E vision pa loke ta partido RED Democratico tin pa loke ta trata cannabis, segun Thielman ta algo cu ta bay hopi mas leu cu “bende cannabis” pa motibo cu esey no ta e vision di e partido sino cu nan ta amplio manera economia, e ta genera placa, e ta genera industria, e ta crea trabou y e ta genera pa e pais.

Pa loke ta trata e area social, nan por wak cu ora cu tin regulacion en bes di prohibicion tin un manera sigur na unda e hende por tin acceso na cannabis y tambe un calidad di cannabis na unda e persona sa kico e ta cumprando , kico ta consumiendo y kico e mester pa lo cual ta trata uso di cannabis sea medicinal of recreacional.

Di problemanan social, cu manera Thielman a sigura e hende ta keda bisa cu legalisacion di cannabis ta bay amplia problemanan social “te cu awo a mi no ta scucha cu ora cu tin problemanan social esaki ta pa via di cannabis”el a afirma.

Di loke tin di haber cu medio ambiente, “e cannabis ta haci milager pa lo cual ta medio ambiente” na unda cannabis por haci tera limpi na unda e ta crece, kita contaminacion di medio ambiente “lo cual nos mes ta ocasiona” y cu e por sanea tereno di Valero y refineria, tur esaki ta den e vision Thielman a finalisa.