Segun Ricardo Croes, awo Master Student na Universidad di Aruba den Facultad di Derecho, nos legisladonan mester a realisa caba cu pa e motibo cu nan ta falta e conocemento medico y cientifico necesario di e materia ta kisas un di e motibonan pakico nos no por avansa ariba e tereno di regulacion y/of legalisacion di Cannabis y e beneficio real cu esaki por trece pa pais Aruba den diferente area awor aki mas cu nunca.
Pakico a dicidi di bay studia ley?
Despues di a pasa y mira den varios situacion fastioso riba caya pa cu e manera con ta trata cu droga y despues di a haya mi mesun experiencia cu polis y wordo trata na un manera cu e no ta kere cu ta husto relaciona cu e consumo di Canabis na Aruba, mi a dicidi di bay studia ley na Universidad di Aruba. ”Ami no ta kere cu husticia ta algo cu ta sosode riba su mes y mi no ta bao di e impresion cu den e forma cu ami ta mira husticia tuma luga na Aruba, cu esaki no ta husticia. Anto a yega ora caminda mi di a yega momento pa mi haci algo al respeto”, sr.Croes ta splica. ”Loke mi por bisa bo di mi experiencia akinan como studiante na Universidad di Aruba ta cu mi mester a traha basta duro no solamente pa mi estudio sino hasta pa e docentenan acepta manera cu mi ta. Esaki ta algo cu pa un motibo of otro semper tabata e caso varios biaha caminda cu tin hende na cuminsamento ta wak mi den un forma y despues nan ta realisa cu mi no ta ken nan a kere cu mi ta. Mi tin cu bisa cu e relacion cu mi tin cu tur e docentenan akinan na Universidad di Aruba ta uno hopi bon mes y e desaroyonan durante e añanan a bay solamente pa e miho”, Sr. Croes ta splica Bon Dia.
Segun Sr. Croes, Te na e momentonan aki e no a defini precies ainda kico ta su siguiente pasonan despues cu termina su estudio di ley na Universidad di Aruba cual e ta spera cu Dios su poder pa finalisa e aña aki, sinembargo ta evaluando si ta bay sigui den abogacia pa continua cu abogacia pa asina eherce e profesion den futuro. ”Den comparacion cu 2012/2013 cu ta e momento cu mi a cuminsa bin dilanti na radio y na television pa awor aki tin hopi cambio positivo na Aruba. Tin asina hopi cambio cu mi a puntra dokternan pa medio di un entrevista na un canal di television local pa por fabor nan stop di manda hende cerca mi pasobra mi no tin ni cannabis ni oil pa yuda niun hende. Pero esey pa mi ta significa cu den e nivel di dokternan, e personanan cu ta encarga cu cuido di hende, un cambio a tuma luga. Sinembargo, e cos aki ta ilegal na Aruba y nos ta wordo confronta cu ley ” sr. Croes a splica Bon Dia.
Con por ta cu nos ta tuma algun ley over for di Hulanda y otronan no?
Segun Sr. Croes, despues di 1986 Aruba tin un autonomia cual ta encera cu nos mes
ta dicidi kico e leynan ta na Aruba pa cual nos ciudadanonan mester tene nan mes na dje. ”Nos no ta obliga na ningun momento so pa djis tuma over locual ta di Hulanda, nos tin cu corda, nos no ta Hulanda. Sinembargo, nos a tuma over masha hopi ley pasobra nan ta beneficioso pa nos. Lastimamente, nos legisladonan kendenan ta esnan cu ta traha e leynan y faltando e informacionnan adecuado, nan ta tuma decisionnan eroneo” sr. Croes ta splica Bon Dia.
Sr. Croes ta agrega cu sinembargo hasta ora nan tin informacion corecto, nan ta tuma decisionnan eroneo. Ta manera cu nan a demostra di ta ”partidista”, of di ta sirbi un agenda personal y no e interes general di e pueblo. ”Leynan di Hulanda, en principio ta conta pa Hulanda, na Aruba nos ta traha nos leynan y ami ta bao di e impresion cu ya nos legisladonan mester a realisa caba cu nan falta e conocemento medico/cientifico necesario di e materia y despensa mi bisa, pero nan falta di interes pa busca e informacionnan aki tambe y actua den un forma pro activo, acercando e mundo medico no solamente nacional, pero internacional, ta pone cu nan ta keda cu e leynan bieu, y cu nan intencionnan di papia di ”gateway drug” etc, nan ta bay over, cual e gobierno aki a haci tambe, na criminalisa blachi y simia di cannabis cual no tabata algo castigabel den nos leynan, Sr. Croes ta splica.
Segun Sr. Croes, nos legisladornan no solamente no ta obliga pa tuma leynan over for di Hulanda, nan a tuma esunnan cu ta bon, pero nan ta deficiente den haci un trabao corecto cu ta beneficioso pa Aruba. ”Mi ta prefera nos keda cu nos autonomia, mi ta prefera nos keda cu e responsabilidad di dicidi kico ta nos leynan, pero mi ta bao di e impresion tambe cu si nos tin cosnan bon cu nos por tuma over no solamente for di Hulanda, sino cualkier otro pais , nos mester haci esaki tambe semper y cuando e ta beneficio pa e comunidad di Aruba en general” Sr. Croes ta comenta.
Legialisacion di Cannabis ta un necesidad
Cu Cannabis mester ta legal awe ta un necesidad mas grandi cu tres aña pasa. Specialmente mirando e desaroyo concerni y cu e informacion disponibel tocante cannabis a bay dilanti formalmente segun Sr. Croes. ”Ta masha hopi hende mes, den tur categoria, dus di adolescente, studiantenan, hendenan cu ta profesionalnan, pashentnan, hende grandi, ta na altura cu cannabis no ta e ”gateway drug” cu nan ta purba di pusha keto bay na Aruba den cabes di hende. Cannabis no ta e problema cu nos tin, e problema cu nos tin ta falta di educacion y informacion di calidad basa ariba e productonan aki y con pa trata e problematica aki.” Sr. Croes ta splica.
Segun Sr. Croes, e ta 100% sigur cu tur hende cu a busca informacion cu ta abunda riba internet awendia, lo a haya sa cu cannabis no solamente ta bon pa tur hende. Tambe e ta un alimento y tur hende cu sa y ta na altura di esaki sa tambe cu den e simia di cannabis tin hopi mas ”volwaardige eiwitten” cu tin den tur otro bonchi cu excepcion di e bonchi di soya cual ta e unico cu ta gane. Asina mi por continua compartiendo cu bo tur sorto di beneficio cu abo mes por Google. Nos por traha entre otro: cas, paña, fuel pa auto sin cu e ta dañino pa e ozon, nos por haci tur esey cu cannabis apart di djis huma esaki anto bira halto cual ta e pensamento cu ta bende e pueblo cu no sa miho y cu ta droga nos ta droga”, Sr. Croes ta bisa.
