Ex-vice ministro di energia electrico di gobierno di Hugo Chavez, Nervis Villalobos a keda deteni, riba orden di captura di banda di gobierno di Merca, pa su supuesto participacion den un plan di soborno, cu tin relacion cu e empresa di estado Venezolano, Petroleos de Venezuela S.A. (PDVSA)
Un vocero di polis civil a bisa cu Nervis Villalobos, a ser deteni na Madrid, pa un unidad di polis cu tin specialisacion na delito di labamento di placa. E solicitud a sali for di un acusacion formal di banda di fiscal federal di Merca.
E vocero a splica cu e ex-funcionario di Corpoelec, Luis Carlos de Leon a keda deteni tambe, ora cu polis a detene hunto cu un ex-ehecutivo di compra di PDVSA.
Villalobos ta e prome ex-funcionario halto cu ta deteni como parti di un investigacion di Merca riba e topico di corupcion den PDVSA, cu tin mas di 10 empresario cu a declara nan mes culpable caba.
Corant El Tiempo Latino a informa cu Javier Alvarado, ex-presidente di e empresa di electricidad na Venezuela y Bariven, cu ta un empresa afilia na PDVSA, ta envolvi den caso di corupcion di varios proyecto vincula cu e empresa di electricidad na Venezuela.
