Riba ruta pa e proximo 25…Periodismo obhetivo ta necesario pa mantene comunidad sano

Celebracion di aniversario semper ta momento pa mira atras pa evalua loke a transcuri den tur e añanan ey. Nos edicion special a duna bastante motibo pa pensa kico a sucede den tur e añanan ey y ki papel e corant aki a hunga aden. Y pasando den e edicion ta haci bo realisa cu loke bo ta mira bo dilanti, no ta historia di e corant so, sino di Aruba mes tambe. Ora Bon Dia a cuminsa na aña 1991 ya caba a cuminsa vislumbra e Aruba cu nos conoce awe, solamente nos no tabatin idea ainda cu awor nos ta papiando 110.000 habitante, and counting… Pero esey ta e sociedad cu a crea, birando den e proceso un di e paisnan mas pobla na mundo. Nos no ta bisa esey pa lamenta, ni mucho menos sugeri cu mester draai algo bek. Pero si ta necesario reconoce e situacion cu nos ta den awe pa por determina unda nos ta bay den e proximo 25 aña. Realmente loke nos a presencia ta e di dos ola migratorio grandi di siglo pasa. E prome tabata leu nos tras caba, den añanan binti y trinta di siglo pasa y a  trece e prome generacion di hopi hende cu awe ta yama Aruba nan cas, y nan yiu y nietonan a nace aki y ta yama nan mes cu orguyo Arubiano. Esey no ta bisa cu tur di nos tabata prepara pa loke tabata bin. Crece di 10.000 pa 60.000  ta un cos, pero di ey pa mas di 100.000 tabata algo cu a preocupa hopi di nos. Discuti e presencia di tanto hende di exterior cu a bin pa haci Aruba nan cas, ta algo di tur dia y no semper den un ambiente positivo. Esey ta parti innegable di nos realidad cotidiano. Pero, lo contrario tambe ta berdad y esey ta cu tin un aceptacion grandi ora ta trata relacion personal. Ta remarcabel tende Arubiano zundra stranhero, basta no ta trata di nan amigonan pasobra naturalmente ‘nan si ta bon hende’. Y asina aparentemente cada un di nos tin algo di e actitud ey. Esey ta algo malo? Nos ta hende cu ‘split personality’ ora nos ta actua asina? Realmente no, na nos opinion, e ta e manera con nos ta deal cu e situacion, haciendo lo maximo di loke ta presenta nos dilanti, na un manera practico y pragmatico. Talbes esaki ta un di e talentonan mas grandi di e Arubiano y nos mester sinti nos mes mas bien orguyoso di ta asina. Un anecdota pa ilustra esaki.

Casi binti aña pasa un delegacion di experto Hulandes a bishita Aruba pa entre otro papia y observa nos situacion encuanto integracion di tur e cantidad di stranhero cu pa e tempo ey caba tabata yega na casi un tercera parti di nos poblacion. Ora e pregunta a cay ‘ta con boso ta bay integra tur e hendenan aki, boso tin un maneho di integracion? Un di e funcionarionan Arubiano a bira contesta prome cu tur otro:”si, nos tin un maneho pa e cos aki. Nos ta gusta nan, namora nan,casa cu nan, haya yiu cu nan, and get it over with.” E contesta di un di e Hulandesnan tabata mes cortico pa termina e discusion:”Anto anos macamba por siña algo di boso ainda.” Y e grupo completo a pasa pa papia di otro tema.

E anecdota aki ta ilustra pakico mester mantene optimismo pa loke ta e flexibilidad y mas cu tur cos e tolerancia y capacidad di acepta otro hende manera nan ta. Esaki ta haci tambe cu e stranhero no ta sinti tanto necesidad di bay sconde den su grupo, cu nan mes cultura,nan mes musica, etcetera. Integracion y asimilacion no ta tema cu mester pone ambtenaar traha ariba. Sin embargo, tin un banda menos positivo tambe. Nos a crea un comunidad hopi grandi pa un isla chikito asina, mayoria biaha basa riba trabao cu no ta exigi hopi enseñansa y no ta duna un salario grandi tampoco. Dos salario minimo no ta yega pa cera e minimo necesario pa mantene un famia di mama, tata, y dos yiu. Ta keda falta como mil florin pa luna pa yega ey…

Nos por simplemente subi caya y exigi miho pago? No, pasobra nos ta biba den un region unda salario minimo ta un fraccion di loke ta paga aki. Pero ta bira tempo si pa nos cuminsa atende e problemanan grandi cu e situacion aki ta trece cun’e. Por ehemplo, cu sigur 60% di nos poblacion, Arubiano o esnan recien yega, no tin e capacidad financiero pa construi nan mes cas. Y nos tin añanan sin mira construccion di vivienda pa pueblo. Tin mas di e problemanan structural aki cu ta grita pa solucion, prome cu e tipo di problema aki cuminsa daña e ambiente cu ta positivo ainda. Ta p’esey ta asina importante cu nos no tin solamente prensa cu ta limita su mes na trece opinion politico, pero cu ta dedica tempo y recurso na informa pueblo, sin necesariamente impone un pensamento politico. Bon Dia lo t’ey pa haci exactamente esey.