Riba peticion di Hulanda I&O Research ta investigando: Grupo grandi kier vacuna, pero no di tecnologia mRNA

Tin gran parti di pueblo cu no ta vacuna ainda. Tin un parti pasobra simplemente na no ta kere den vacuna (no ta kere den coronavirus); pero tin un grupo cu no ta kere den e vacunanan cu ta usa tecnologia experimental, produci cu virus sintetico.

Nan ta para tras di e vacuna tradicional. Tin posibilidad na caminda, cu e vacuna produci pa e compania Novavax – pero con ta para cu derecho di e grupo aki?

Te aworaki Aruba a bin ta ricibi solamente vacuna Pfizer / Moderna, cu tabata un di e promenan riba mercado. Su produccion rapido a crea hopi duda bao di un grupo grandi y autoridadnan local ta consciente cu e esaki ta e caso aki tambe na Aruba.

Durante e conferencia di prensa riba diasabra pa anuncia medidanan, e pregunta aki a bini dilanti. Hopi hende kier sa kico ta bay haci cu e grupo grandi di persona cu no ta vacuna ainda, simplemente pa motibo cu nan no ta kere den Pfizer. Ki otro posibilidad e grupo aki tin? Nan kier sa si ta habri e caminda cu nan por scoge e vacuna cu nan kier, inclusivo si esaki ta encera cu nan mester cubri e gasto.

Sharline Koolman, di Departamento di Malesanan Contagioso, a splica cu na Aruba ta usa solamente vacunanan aproba door di FDA (di Merca) y EMA (Europa). Desde cu a cuminsa cu vacunacion, Aruba y e otro cinco islanan ta haya tur nan vacuna for di Hulanda. Y pa Aruba, ta trata di e vacuna Pfizer.

Sinembargo, el a splica, nan tin den stock desde dos luna atras un alternativa pa esnan cu no kier haci uso di Pfizer. Ta trata aki di e vacuna di Johnson & Johnson, cu ta otro tipo di vacuna, pues no ta basa riba e sistema di mRNA, pero e vacuna traha di un forma diferente na esun di Pfizer, usando dos ‘strand’ di DNA en bes di uno. Esnan cu no ta kere den Pfizer, por haci un cita yamando Salubridad Publico. E unico desbentaha ta cu mester vacuna den grupo cada bes di dies persona, pasobra cada caha cu habri tin dies vacuna. Ora cu tin un grupo di dies of binti persona, ta vacuna e grupo aki mayoria biaha riba diabierna.

Koolman a splica cu Aruba a haya 2500 dosis di J&J, pero te aworaki a usa rond di 100 vacuna so. Na diferente ocasion a publica cu e ciudadanonan tin un alternativa si nan no kier Pfizer.

Sin embargo, informacion compila door di EA News ta mustra cu hopi hende kier e vacuna nobo Novavax, cu ta uno produci di e forma tradicional, cu tecnologia di ‘recombinant protein’. Pero nan no ta haya contesta di autoridadnan con nan por yega na remarca pa vacuna di Novavax, cu dentro di algun siman lo haya su aprobacion pa e uso como vacuna di emergencia. Esaki ta un posibilidad cu no solamente Gobierno, pero autoridadnan local di salud, lo mester permiti, pa logra un vacunacion mas amplio, segun e pensamento di cada ciudadano.

Novavax

Novavax ta wordo considera e speransa nobo pa combati Coronavirus y ta ofrece un proteccion di 100% contra casonan grave di Covid y lo por hunga un papel central den e campaña mundial di vacunacion.

E tecnologia usa ta conoci, e formula ta efectivo, e ta facil di transporta y warda, y por produci esaki den cantidadnan grandi hopi lihe.

Cu un nivel di efectividad di 90.4%, e vacuna NVX-CoV2373 ta na nivel di esnan prepara a base di mRNA di BioNTech/Pfizer y Moderna. En concreto, entre e personanan cu a ricibi e dos dosis di Novavax tabatin 90 porciento menos di casonan di COVID-19 compara cu esnan cu no a wordo vacuna. Pero loke ta importante ta cu e vacuna a logra na 100% di proteccion contra casonan medianamente grave y grave.

NVX-CoV2373 no ta un vacuna di mRNA (manera esnan di BioNTech/Pfizer y Moderna) ni di vector (manera di AstraZeneca y Johnson&Johnson). NVX-CoV2373 ta basa riba proteina, e ta contene un particula chikito di e proteina ‘Spike’ di coronavirus. E formula ta funciona mescos cu e vacunanan contra hepatitis B o tetanos. P’esey e tambe ta bin den dos dosis. E tipo di vacunanan aki ta conoci y ta mas tolerabel pa e curpa humano. E unico desbentaha ta cu ta tuma mas tempo a desaroya nan y ta motibo cu te awo el a bin keda cla.

Banda di esaki, NVX-CoV2373 ta un vacuna combina, cu ta protege contra coronavirus y griep na mesun momento.

Organisacion Mundial di Salud (WHO) a bisa cu e impacto di vacunanan COVID-19 riba pandemia ta depende di diferente factor. Con lihe por produci e vacuna y cuanto hende vacuna. Pero vacuna di COVID-19 lo no ta 100% efectivo. Ta trahando pa nan ta mas efectivo posibel, pa nan tin un miho impacto riba e pandemia. “Pero no ta e vacuna lo stop e pandemia, e ta e vacunacion. Mester sigura acceso husto y igual na vacuna, y sigura cu tur pais ta ricibi esaki y usa nan pa protege nan hendenan.” Aruba por cumpli cu e pensamento aki habriendo posibilidad pa tur hende vacuna, creando posibilidad di acceso na diferente tipo di vacuna, incluyendo Novavax.

Sinembargo I&O Research lo haci investigacion riba tur seis isla dicon si y dicon no e personanan ta vacuna. Cu esaki Hulanda y e gobierno nan di e isla lo haya e resultado y sa tambe kico tur ta biba bao di e comunidad riba henter e situacion di vacuna contra di Covid -19. Asina tambe ta haya sa con dispuesto e habitantenan di cada isla  ta pa vacuna si of no.

Importante ta pa haya informacion dicon hende ta vacuna y dicon nan no ta vacuna , e situacion aki no ta trata pa haya sa sea cu bo a vacuna of no a vacuna, pero mas tanto kier haya sa e motibonan dicon a vacuna y dicon no ta scoge pa vacuna.

Na momento cu e investigacion keda cla lo duna cada gobierno y tambe gobierno di reino Hulandes e resultado pa asina nan haya sa kico ta biba bao di cada comunidad di cada isla. Na momento cu Hulanda haya esaki lo keda na Hulanda pa dicidi kico nan lo bay haci cu e consehonan cu I&O Research a acumula pa nan entre e islanan. E team cu ta investigando nan enfoke ta tambe pa tur hende haya un stem y vocifera kico nan ta sinti riba henter e proceso di vacunacion na e islanan den Caribe cu ta Aruba, Boneiro, Corsou, Saba, Sint Eustatius y Sint Maarten.