Diadomingo 14 di januari atardi, Bernardo Arévalo de León ta huramenta como Presidente di Guatemala. Presidente Arévalo ta un sociólogo, diplomatico, politico y presidente eligi di Guatemala na augustus ultimo cu un mayoria absoluto di voto.
Señor Arévalo ta yiu di ex-presidente di Guatemala na 1945 pa 1951, y ta e di 52 presidente di Guatemala. Presidente Arévalo a forma su Gabinete di 7 hende muhe y 7 hende homber y tin un programa di gobernacion extenso specialmente pa loke ta trata combati corupcion y respet na derechonan humano.
Prome Minister Evelyn Wever-Croes ta na Guatemala pa e traspaso di mando di Presidente saliente senior Alejandro Giammanttei pa señor Arévalo.
Riba di dos dia di su bishita na Guatemala, diadomingo 14 di januari mainta, Prome Minister a reuni cu Presidente Arévalo y a hiba combersacionnan di maneho di Gobierno di Aruba y lasonan di Aruba y Guatemala.
Den nomber di SM Rey Willem Alexander, Prome Minister a entrega señor Arévalo un carta reiterando e sosten di Reino Hulandes na Guatemala y na Presidente Arévalo y su programa pa combati corupcion y respet na e derechonan humano.
Prome Minister, den nomber di Reino, a felicita Presidente Arévalo y a dese’e tur clase di exito enfatisando tambe cu su persona y Gabinete Wever-Croes ta identifica su mes cu e programa di gobernacion di e Gabinete di Presidente Arévalo den combati corupcion y respeta derechonan humano y por conta tambe cu sosten di Aruba den esaki.
