Solamente Gobierno di Corsou a acepta e proposicion di e Entidad di Reforma y Recuperacion pa ricibi pa sosten di likides di Hulanda, ya pa e aña aki caba ta cuminza colabora na interes di enseñansa. Esaki ta locual Prome Minister di Corsou, Eugene Rhuggenaath a informa Presidente di Staten di Corsou, Ana-Maria Pauletta. Den su carta na Parlamento di Corsou, Rhuggenaath a bisa cu Gobierno ta mustra cu enfasis cu e compromiso aki ta pa bienestar general y perspectiva pa su pais.

E carta ta inicia cu ilustracion di e presentacion di e Consensus Rijkwet pa e Entidad di Reforma y Recuperacion, cu ta un condicion pa por sigui ricibi sosten di likides. A haya e proposicion aki dia 6 di Juli y durante e reunion di Conseho di Minister di Reino di dia 10 di Juli, a rechasa e proposicion. Sinembargo, a sigui lunanan di discusion y reunionnan entre Corsou y Hulanda na nivel di gobierno y ambtenaar pa asina por yega na otro. Y esey ta e caso awor.

Pa Gobierno di Corsou, e clarificacion y precision di e posicion y papel di Parlamento den e proposicion ta uno importante. Esaki tabata un punto di discusion intensivo cu Hulanda. Particularmente e responsabilidad di Parlamento como e Organo Legislativo cu mester keda cu su derecho di presupuesto. Parlamento lo keda cu su autoridad pa aproba cualkier ley y regulacion pa cualkier reforma of cambio di structura. Banda di esey, Paralemnto mester aproba gasto y entrada di presupuesto. Aunke cu e reformanan desea ta dirigi pa haci Corsou mas sostenibel y fuerte, ta asina tambe cu Hulanda lo hala su sosten rechasa riba Parlamento no ta accepta e rijkswet aki.

E landenpakket, un areglo interno basa riba articulo 38, inciso 1 di Statuut, lo keda elabora den gruponan di trabou conhuntamente, basa riba un agenda di ehecucion cu plannan di procedura y un paragraf financiero. E entidad ta yuda cu e formulacion, ta monitorea e cumplimento di e palabracionnan y ta sostene e ehecucion. Corsou pues en principio ta ehecuta e reformanan su mes cu sosten di e entidad. E intencion ta cu e entidad lo traha cu y pa Corsou, Rhuggenaath a informa Parlamento Hulandes.

Pues ta premira u lo drenta den deliberacion constante cu Gobierno. Tambe ta asina cu e organo no por ehecuta decisionnan cu ta keda un responsabilidad di un organo publico, y mester sosode basa riba leynan di Corsou. E organo por unicamente ehecuta proyectonan y programanan tanten cu esakinan ta referi den e ambito priva, algo cu de facto por sosode caba sin e rijkswet.

Proceso di Rijkswet

E proceso di decision riba e Rijkwet, incluso e rol di Parlamento y Raad van Advies ta claramente determina den Statuut. Parlamento por dicidi pa finalmente no aproba e Rijkswet. Pero tur inversion den e landenpakket cu ta inclui den Presupuesto ta someti na deliberacion den Parlamento. Messcos cu e proposicion di ley, ehecucion di e landenpakket ta mara na decision di Parlamento di Corsou.

Composicion organo

Corsou y Hulanda a yega na un acuerdo cu directiva di e organo independiente mester ta representativo pa Corsou y cu e miembronan mester tin afinidad cu e parti Caribense di Reino. E nombracion di por lo menos un di e miembronan lo sosode den deliberacion cu Minister Presidente di Corsou. E otro miembronan lo keda nombra den consulta cu Corsou, basa riba un perfil cu ta deseabel.

Ciclo di Presupuesto

Manera cu a mustra caba, e entidad no ta tuma e autoridad legislativo ni esun ehecutivo di Parlamento y/of Gobierno, tampoco e autoridad di presupuesto. Tin inversionnan, sea ta prestamo, subsidio of regalo, cu ta determina pa Parlamento si nan tin influencia riba presupuesto.

Ora di cera acuerdo di financiamento, lo tene cuenta cu e ciclo di presupuesto anual y tur procedura di presupuesto, incluso adaptacionnan, cu ta sigui.

Evaluacion y terminacion Rijkswet

E Rijkswet riba e organo lo termina automaticamente despues di seis aña. Tin un provision inclui, unda lo tin un evaluacion di con e ta funciona. Esaki ta despues di tres aña. E evaluacion lo keda ehecuta pa un comision di miembronan independiente di cua dos ta nombra den acuerdo cu Gobierno di Corsou. Por termina e Rijkswet tur momento cu acuerdo mutuo.

Participacion di entidadnan legal

Participacion den e capital di accion di companianan priva, por sosode unicamente riba peticion di Corsou y despues cu ricibi aprobacion di accionistanan. Ademas, mester di aprobacion di Parlamento ora ta trata di companianan di Gobierno. E organo pues por inverti den entidadnan legal riba peticion y cu aprobacion. Lo tene cuenta cu e caracter temporario di e areglo y e tipo di financiamento di e participacion na momento di e financiamento. Segun e areglo, e medionan financiero cu cual e organo Hulandes lo adkiri accionnan, lo bin pa cuenta di Hulanda, sin cu esaki ta keda marca como prestamo pa Corsou.

Reforma y Desaroyo

Gobierno ademas a palabra explicitamente cu no lo trata solamente pa reforma y baha gasto, pero cu e ta bay pa fortifica e posibilidad di crecemento y entrada di Corsou na un forma sostenibel. Hulanda a compromete su mes na e punto aki, a base di programanan y proyectonan concreto. Hulanda lo co-inverti den economia di Corsou, entre otro den un bon structura di enseñansa y cuido accesibel. E landenpakket y e programa di recuperacion y provisionnan ta locual ta guia y e strategia y acuerdo di crecemento lo ta inclui den esaki.

Cu e proposicionnan acorda, Corsou lo por inverti grandemente den fortificacion di e structura di economia duradero, enseñansa y cuido, y coherencia social, mas cu tabata posibel sin e sosten di Hulanda.

Punto di bista di Gobierno

Cu bista riba bienestar di comunidad di Corsou, Gobierno di Prome Minister Rhuggenaath ta di opinion cu a yega na un resultado balansa, pa yega na un colaboracion cu Hulanda. E desaroyo y ehecucion, e realisacion di finanzas publico duradero y sostenibel, y fortificacion di e capacidad di recuperacion economico di Corsou, manera ta poni den e acuerdo di Gobernacion y lo bay man den man cu innovacion y aporte di capacidad local y internacional, y inversion grandi, sea for di fondonan propio, prestamo, subsidio y regalo.

Corsou tin e posibilidad cu e areglo aki pa tuma un paso grandi pa adelanto, Rhuggenaath a bisa.

E procedura di toma di decision formal pa yega na un Rijkswet mester inicia ainda. E prome paso ta pa presenta e proposicion na Raad van State. Conseho di Minister pa dispuesto pa acepta e areglo, basa riba e resultadonan di negociacion.

Awor cu tin un acuerdo politico y despues di firma pa e landenpakket, lo inicia mesora cu e elaboracion conhunto den un agenda di ehecucion. E meta ta pa cuminza cu e aña aki ainda cu reformanan structural palabra y programanan di inversion y proyectonan manera enseñansa.

Ministerio pa Asuntonan Interior y di Reino, BZK ta planeando un organisacion di trabou temporario, pero cu ta consisti di personanan cu experiencia, experticio y tambe lo aloca fondonan pa cuminza mesora cu proyectonan pa enseñansa na Corsou. E organisacion aki ta anticipa e establecimento formal di e organo. Asina lo no perde tempo y na caminda lo acumula experiencia pa e forma di traha.

Finalmente Gobierno di Corsou ta mustra cu enfasis cu e compromiso politico aki, no ta nifica cu no por cambia di direccion. E decision aki no ta mishi cu competencianan di Parlamento, paloke ta tratamento di e concepto manera ta poni den Statuut.

Parlamento lo por duna su punto di bista den tur fase di e proceso di tratamento di ley, cu segun proyeccion , lo tuma seis a nuebe luna. Hasta por vota contra si ta desea esey.

Rhuggenaath a bisa cu ademas a puntra Raad van State pa duna conseho specifico riba algun punto. Esakinan por yuda na mehoracion di e Rijkswet. Gobierno di Corsou ta drenta e siguiente proceso cu conviccion, segun Prome Minister Rhuggenaath, y ta wak den e organo, e beneficio pa tur hende di Corsou.

Rhuggenaath a termina e carta bisando cu e ta mas cu dispuesto pa duna un splicacion mas amplio na Parlamento.

Reaccion Aruba y Hulanda

Prome Minister di Aruba, cu na e momentonan aki ta na Florida, a duna comentario na dos medio di prensa na Aruba, incluso Amigoe di Aruba, unda el a bisa cu e areglo cu Hulanda a yega cu Corsou ta similar cu locual a acorda cu Aruba. E motibo pakico Aruba no a acepta ta pasobra Hulanda lo a bin cu un condicion acerca, esta cu e di tres tranche lo mester cubri cinco luna en bes di tres. Esaki a hinca Gobierno di Aruba den problema pasobra tin un buraco financiero. Segun NoticiaCla, esaki a pone pakico cu no por a sinta warda y a bay busca fondonan riba mercado local. A logra 173 miyon florin, algo pa cua Prome Minister ta hopi agradecido.

Di otro banda, Prome Minister Wever Croes a bisa Bon Dia Aruba, 10 di Juli, cu Aruba lo uza su propio reservanan pa asina gana tempo pa negocia. Di su banda Raymond Knops, Secretario di Estado a declara cu si Aruba tabatin mester di mas fondo, lo por a haci e peticion na CAFT, cu por a recomenda mas sosten financiero. Wever Croes a bisa NoticiaCla cu Hulanda a dicidi pa haci e declaracionnan aki basa cu nan mes a reconoce nan eror. Locual ta wardando awor ta e decision di Hulanda pa e conseho di CAFT, pa asina sigui papia riba e contenido di e Rijkswet.

Pa loke ta Corsou, Secretario di Estado Knops a informa e mesun medio aki, esta NoticiaCla cu berdad tin señalnan prometedor for di Corsou, pero cu e combersacionnan ta andando ainda. Pues no tin un acuerdo ainda. Corsou mes no a firma ainda.