Prome Minister di Corsou Eugene Rhuggenaath lo ta di bishita mañan, 18 di october, cerca e refineria Heide na Hemmingstedt, Alemania. E lo haya un tour di e facilidadnan opera pa Klesch Group, cual ta e candidato principal pa tuma over refineria isla.
E refineria Heide, segun nan propio website, ta e refineria den e region mas noord di Alemania cu ta procesa azeta crudo. Desde antayera e prome minister ta na Brussel, unda e lo ta kedando te awe. Prome cu esaki Rhuggenaath a bishita Den Hag rapidamente, unda el a reuni cu Prome Minister di Hulanda Mark Rutte, secretario di estado Raymond Knops di relacionnan di Reino, pero tambe Embahador di China pa Reino Hulandes, pa asina delibera riba e ultimo desaroyonan na Corsou.
Cu Knops a combersa riba e continuacion di e trabou pa ehecuta e acuerdo di crecemento cu a cera cu Hulanda. Cu e embahador di China, Xu Hong, prome minister a conoce pa prome biaha, unda a combersa riba mehora e cooperacion entre China y Corsou. Rhuggenaath a indica cu e combersacionnan aki a bay ‘sumamente positivo, unda nos por a intercambia ideanan riba con pa mehora e cooperacion entre e dos paisnan’.
China ta un di e 12 paisnan di enfoke pa Corsou su maneho di relacionnan strategico cu paisnan den exterior. Puntonan di enfoke ta entre otro turismo, Corsou su funcion como hub logistico, sector financiero, accion contra cambio di clima y tambe intercambio cultural. Prome minister y e embahador a palabra cu e embahador lo haci un bishita na Corsou, mientras Rhuggenaath lo bishita China tambe.
