Gobierno di Corsou no ta haya necesario pa supuestamente balansa e presupuesto di 2019. E aanwijzing cu gobierno na Den Haag kier impone e siman aki lo mester conoce algun cambio. Bay Raad van State parce ta e unico manera pa bira e situacion actualmente.

Nos ruman isla tin miedo cu e medidanan cu gobierno Hulandes lo kier bay impone lo influencia di manera negativo e crecemento economico y poder di compras riba e isla. Hasta IMF (Fondo Monetario Internacional) ta na banda di gobierno di Corsou encuanto esaki.

Den IMF su rapport despues di a bishita e isla luna pasa, nan ta haya cu lo no tin sentido pa compensa pa e deficit den un ambiente economico suak. Esey lo haci cu economia lo krimp mas, segun IMF. E porcentahe di e krimp economico actualmente ya ta riba 5.5%.

E proposicion di gabinete Rhuggenaath ta pa dentro di e cuadronan cu e Rijkswet Financieel toezicht ta stipula haya un espacio unda por tanto sigui crece economia como garantisa un finanzas publico sostenibel den forma di reformanan structural.

Esey lo trece cune cu pa compensa pa e deficit lo mester saca afo varios aña. ‘Un periodo realistico pa compensa pa e deficitnan durante 2017 te cu 2019 y posibelmente 2020, lo bay te un periodo di cinco aña entrante 2021’, segun Rhuggenaath, kende ta sinti cu e Rijkswet financieel toezicht mes ta apoya e pensamento aki.

E ley di Reino (rijkswet) aki no ta prescribi un termino di compensacion pa deficit, ademas cu e organo di supervision Cft ya caba a menciona den su conseho cu aplica articulo 25 di e ley (condicion di calamidad) lo ta un opcion pa Corsou pa asina parti e deficit den un periodo mas largo di varios aña.

Lo menciona lo nifica sinembargo cu durante 2019 y 2020 lo mester bin e medidanan mas intensivo pa asina percura cu e deficitnan keda minimo. E medidanan aki lo ta duro pero no mesun duro cu esunnan cu lo bini den e aanwijzing.

Impacto di aanwijzing

Calculacion di e impacto macro economico cu si sigui manera cu ta bayendo den 2019 lo nifica cu e producto nacional bruto (BNP) lo baha cu un 3.7% den 2019 y cu 8.6% den 2020. Esaki segun Rhuggenaath.

E efecto riba economia en general lo ta bastante negativo, specialmente pa personanan cu salarionan abou. Un aanwijzing riba gobernacion di Corsou lo no trece ningun balor adicional pa realisa e metanan cu tin den mente di crecemento economico, mas bien esaki lo forma un obstaculo pa nan, segun e prome minister.

E enfasis riba bin cu un solucion riba corto plaso no lo trece suficiente trankilidad den gobernacion y no lo tin apoyo pa esaki di banda di comunidad pa lo por implementa e reformanan structural y medidanan necesario pa yega na un sanacion duradero.

Comparacion

Si Corsou yega na porta di Raad van State, esaki por lo menos lo duna e isla un tiki tempo. E tempo ey lo ta necesario pa Cft bin cu un analisis constructivo cu e cifranan optimal. Riba otro banda di medaya, si gobernador no firma e presupuesto y keur e af, Corsou lo ta mesun mara cu si bin un aanwijzing.

Aanwijzing na caminda

Tur esaki ta bin despues cu a bira conoci cu conseho di minister di Reino lo ta emitiendo un aanwijzing awe dialuna despues cu Cft a duna conseho pa bin cu esaki pa asina sigura cu e finanzas publico bay den caminda cu nan tin cu bay. E prome minister tabatin un vuelo plania pa Den Haag pa asina negocia tocante e situacion financiero, pero el a cancela esaki na ultimo momento ora el a haya sa cu e aanwijzing ta bin toch. E idea ta cu lo a negocia un plan di ayudo cu Hulanda pero ora cu el a haya sa tocante e aanwijzing, no tabatin rason mas pa bay Den Haag.