Dia 19 di september ultimo, Rey Willem-Alexander a duna apertura na e Aña Parlamentario nobo na e Koninklijke Schouwburg na Den Haag, cu su discurso tradicional, e Troonrede.
Den esaki, a duna atencion special na e parti Caribense di Reino.
Referiendo na “centenares di bishita” cu el a haci den “e prome dies aña aki den henter Reino, cu miles di reunion inspirador,” e Rey a bisa cu esakinan tabatin un gran impacto riba su persona.
“Esaki ta e mesun lasonan profundo cu atrobe mi a sinti durante mi ultimo bishita na e parti Caribense di Reino.” El a menciona su conviccion cu e tejido social di nos comunidad mester di proteccion. “Tin un gran forsa di union den tur cos cu hende ta logra hunto den lo chikito, lo diario, lo simpel. Conexion ta surgi unda hende ta bini hunto. Esaki no ta bin naturalmente, sino ta rekeri atencion y esfuerso constante di nos tur,” Rey Willem Alexander a reflexiona den su discurso.
El a agrega cu esun cu mira sociedad Hulandes for di pafo, ta mira riba un prome bista un pais atractivo cu bon servicio y un economia fuerte, integra den structuranan internacional fuerte cu ta trece proteccion y prosperidad. “Pero tras di e imagen positivo aki,” el a continua, “tin e deber permanente pa sigui traha riba igualdad di oportunidad, seguridad di bida, y perspectiva. Pa hopi hende, no ta normal pa tin un cas digno, bon salud y un situacion di bida sigur. No tur mucha ta haya e mesun oportunidadnan pa un bon futuro, y no tur habitante di nos pais ta sinti nan mes scucha y mira. Discriminacion y exclusion racista ainda ta presente den comunidad,” Rey a menciona.
Riba e tema di racismo, el a bisa cu “tambe pa e motibo aki, e proceso di recuperacion di pasado di sclavitud ta keda riba agenda, specialmente despues di e Aña di Conmemoracion, den henter Reino. Asina nos por traha hunto despues di reconocemento y disculpa, riba sanacion, reconciliacion y recuperacion.”
Rey Willem Alexander a menciona e status demisionario di gobierno, indicando cu esaki ta pone limite riba ehecucion di propuestanan nobo. Ademas, a menciona cu e estado di finanzas publico ta nifica cu mester tin cautela cu finanzas den proximo aña. Pa Hulanda Caribense, a menciona cu lo tin placa adicional disponible pa asina combati pobresa.
Ademas, Rey Willem Alexander a indica cu e gabinete demisionario ta sigui traha riba reforsamento di innovacion y posicion competitivo, y un politica fiscal previsible y stabiel. “Hunto cu e paisnan autonomo Aruba, Corsou y Sint Maarten, e gabiente ta traha riba un economia cu ta prepara pa futuro y un gobierno di calidad halto.”
