E secretario di estado di Estadonan Uni, Rex Tillerson, a yega ayera mainta na San Carlos de Bariloche, Rio Negro, Argentina, pa analisa den su prome encuentro, hunto cu autoridadnan di parkenan nacional, temanan cientifico y di conservacion.
Despues e ta biaha pa Buenos Aires, unda e lo reuni cu presidente Mauricio Macri y canciyer Jorge Faurie.
Voceronan oficial di e secretaria di estado a anuncia, prome cu e biahe di Tillerson, cu e lo a aborda na Bariloche ‘aspectonan di intercambio cientifico y di investigacion cu ta tumando luga entre ambos pais,’ y cu den e Parke Nacional Nahuel Huapi lo destaca con e conservacion (den e area protegi) tambe ta impulsando obhetivonan importante pa e region.
Ni e embahada ni e organismo nacional a duna e agenda di e bishitante, cu segun fuente extraoficial lo a inclui un cabalgata a traves di e parke nacional y un biahe cu boto riba e lago Nahuel Huapi.
Despues di e bishita na Bariloche ayera, Tillerson lo reuni awe na Buenos Aires cu canciyer Jorge Faurie. Tambe presidente Macri lo ta ricibiendo Tillerson durante dialuna. Nan tin programa pa papia di crecemento economico bilateral y cooperacion den materia di siguridad, segun embahada di Merca na Argentina.
Diahuebs pasa, prome cu Tillerson a cuminsa cu su gira den America Latino, el a elogia Macri, cu e conoce di su epoca como CEO di Exxon Mobil, pa e reformanan implementa pa su gobierno, cu el a pone como ehemplo con mester fomenta crecemento economico. A pesar di e bon tono ey, Argentina y Estadonan Uni ta mantene conflictonan comercial abierto: aunke Donald Trump a libera e compra di lamunchi y a promove otro exportacionnan regional, ainda e ta mantene vries e compra di carni, y a aumenta tarifa di importacion pa biodiesel y por yega na pone mas obstaculo tambe pa compra di staal y aluminio.
Awe dialuna mes, Rex Tillerson lo continua su biahe pa Lima, Peru; Bogota, Colombia, y Kingston, Jamaica, pa completa su gira na America Latino, cu a inicia na Mexico.
