No ta un secreto cu desde inicio di aña 2017 e pista di Palo Marga no tabata activo y esey a conduci na un sin fin di caredanan y driftmento ilegal riba camindanan publico cual sigur no ta aceptabel y ta algo cu mester a haya atencion lo mas pronto posibel. Tabata existi un urgencia pa habri e facilidadnan di Palo Marga bek pa asina e actividadnan di Motorsport por bay bek ey riba na un manera reglamenta y sigur pa tanto e participante pero tambe pa esnan cu kier disfruta di esaki, pero a presenta cierto asuntonan legal cu mester a atende cu nan prome cu por a bay over na sigui cu e operacionnan di e facilidad.
E grupo di The Revival of Palo Marga 2 a bin ta traha basta duro tras di cortina durante di e ultimo 2 pa 3 lunanan pa asina no solamente habri e pista bek na un manera responsabel pero tambe pa por tin un plan di maneho duradero y pa un termino largo pa asina garantisa cu e sport di drag race por tin un futuro sigur tanto pa e facilidadnan pero tambe pa e participantenan cu ta inverti bastante placa den nan vehiculo y lo no ta desea di haci esaki y despues tur e inversion aki ta simplemente para den nan garashi.
Por fin a yega asina leu cu por cuminsa cu e prome fase di actividadnan y esaki ta encera cu e eventonan di Street Legal lo mester wordo reanuda lo mas pronto posibel pa asina stop e caredanan ilegal di tuma luga riba caya. E prome evento di Street Legal ta programa pa tuma luga diasabra 10 di juni cuminsando pa 7:30 di anochi y lo ta coriendo e categorianan di Street Legal Auto, Street Legal Bike y e categoria di Scooter/Quad y Jr. Dragsters.
Mientras tanto prome cu e careda aki como parti di e prome fase di reactivacion tambe The Revival of Palo Marga 2 lo continua cu e trabaonan di pone e facilidad bek den condicion, haci trabaonan di mantencion na e mast di e luznan, lo meet y organisa cursonan di upgrading pa e oficial pa asina pa asina poco poco pero sigur trece Palo Marga su facilidadnan y personal bek riba e nivel rekeri pa den un futuro cercano por cuminsa host caredanan di Drag Race local y Internacional bek riba e pista di Palo Marga. Keda semper bon informa di tur loke ta pasando y lo bay pasa na Palo Marga via di e Facebook page di The Revival di Palo Marga 2 y marca e fecha di 10 di Juni riba bo kalender pa asina bo tambe por bay y participa na e evento di Street Legal unda bo por core na un manera safe, reglamenta y bay cas cu placa cash na final di e anochi.
