Ayera tardi, un post riba rednan social a causa furor entre comunidad, specialmente pasobra ta toca un politico popular y esaki net un dia prome cu eleccion. Ta trata di e revelacion di Lisette Chung, indicando cu e tabata victima di violencia domestico pa hopi tempo.

Chung ta ex-casa di ex-minister y actual lider di partido PPA, Otmar Oduber.
Campaña di Oduber tabata hopi turbulento ya cu e ta e sospechoso principal den caso Flamingo, acusa di soborno, fraude cu otorgamento di tereno di erfpacht y contratacion di ambtenaarnan spirito, y abuso di su cargo den e periodo di 2017 te 2019. Esaki tempo cu e tabata minister Desaroyo Teritorial, Infrastructura y Medio Ambiente den Gabinete Wever-Croes I. E caso aki tabata den corte varios dia ultimo siman, y hues ta bay dicta sentencia den e caso na januari proximo.

Den su publicacion, Chung no a menciona ningun nomber, sinembargo, si el a bisa cu e “mester a hunga e papel di e casa trofeo den publico”, indicando cu e abuso a tuma lugar tempo cu e tabata casa.

Chung a bisa den su publicacion:

“Awe mi ta kibra e silencio. Mi a keda keto pa hopi aña, pero awe mi lo vocifera loke semper mi a tene den mi curason. Mi ta cerando un capitulo hopi amargo, y doloroso di mi bida. Mi a biba un bida di miedo pa loke hende lo bisa of pensa di mi. Pero awe mi ta sinti mi liber di por expresa mi mes y empodera. Mi ta un sobreviviente di abuso domestico. Mi a comparti mi bida cu un homber cu no por a controla su rabia y tampoco su mes. Mi mester a hunga e papel di e casa trofeo den publico y tras di porta nan cera wanta e abuso. Na e momento cu mi a dicidi di kibra e laso, mi a wordo enfrenta cu hopi obstaculo baho y vies, cu mi a hera keda pega den e situacion toxico. Pero, cu perseverancia, mi fe y cu guia di esnan cu a pasa den e mesun situacion cu mi, mi a haya e forsa pa kibra e laso, y sigui cu mi bida mas fuerte, y mas resiliente cu nunca. Mi voz tin balor, mi voz tin forsa. Mi no lo wordo silencia mas.
Ban para como hende muher contra abuso domestico. Laga bo voz RESONA. BAN KIBRA SILENCIO.”

Riba rednan social e reaccion tabata feroz. E post di Chung a ricibi mas di mil reaccion den apenas un ora, cu centenares di comentario expresando sosten. Tambe mas di 200 persona a share e post.

Hopi hende a expresa shock y sorpresa pa e revelacionnan, algo cu a subraya e hecho cu hopi biaha, violencia relacional ta tuma lugar tras di porta cera y den silencio. Sinembargo, na Aruba casonan asina ta hopi mas comun di loke hende ta pensa, y esaki por ta e motibo cu e post a crea emocion cerca asina hopi hende den nos comunidad.

Mientras tanto, e revelacion di Chung sigur lo tin impacto riba campaña di partido PPA, ya cu ta afecta percepcion cu hende por tin di nan lider. Por ehemplo, usuario J.M.W., riba un post discutiendo e suceso, a comenta bisando “Un voto pa e partido ta un voto pro violencia domestico y pro violencia contra hende muher!”

Sinembargo, otro usuarionan a destaca e hecho cu yiu di Chung, Dana Arendsz, kende Oduber a cria, a post despues di e revelacion, expresando sosten pa Oduber, referiendo

Bon Dia Aruba a tuma contacto cu Oduber y a pidi un reaccion riba e revelacion di Chung. “Dios ta wak y sa tur cos,” el a bisa Bon Dia Aruba. “Ami nunca lo reacciona riba e bida di mama di mi yiunan. Politica por ta hopi sushi. Kat in nauw maakt rare sprongen.”