Ayera tardi a tuma luga un conferencia di prensa caminda Ministerio di Husticia y Asuntonan Social, Rocco Tjon, hunto cu coleganan minister di husticia di Corsow, Sint Maarten y Hulanda a elabora ariba e Justitieel Vierpartijoverleg cu tabatin durante cual a dialoga ariba diferente tema hudicial.

“Mi kier gradici mi coleganan minister di Hulanda, Sint Maarten y Corsow pa e reunionnan fructifero cu nos tabatin. Mi ta kere cu decisionnan hopi importante a wordo tuma den contexto di mehoracion di e seguridad pa reino y mi ta kere cu den tereno di fortalecemento di aplicacionnan di ley tambe pasonan importante a wordo tuma,” Minister Rocco Tjon a indica.

El a splica cu e reunionnan cu a tuma luga ta reunionnan structural den cuadro di husticia caminda diferente temanan strategico ta wordo trata y decisionnan importante tambe ta wordo tuma.

Minister Tjon a remarca cu a importante cu cada pais tabata presente cu un delegacion amplio cu ta representa full e cadena hudicial for di inicio te na final. Durante e reunionnan aki nan a trata topiconan cu ta toca seguridad di nos frontera, Ministerio Publico, e capacidad pa por ehecuta diferente proyectonan y tambe a para keto pa evalua diferente proyecto cu ya caba nan a papia di dje.

“Awe nos a haya diferente presentacionnan pa loke ta e esfuerso di personal di Marechaussee, personal di warda costa entre otro. Manera ta conoci e ultimo lunanan tin diferente intercepcionnan a tuma luga riba esaki y tur e cifranana aki tambe a wordo presenta durante e reunionnan. “Mi ta kere nos por conclui cu e strategia cu den reino nos ta ehecutando, ta dunando su frutanan,” el a señala.

Na mesun, Minister Tjon a agrega cu ta importante pa nan sigui inverti den full e cadena y esaki ta un punto cu el a comenta a wordo treci pa dilanti door di tur coleganan minister. El a sigui splica cu banda di e plataforma ak nan ta bay traha aworaki tambe pa wak con nan por yega na concretisa e cooperacion miho y tambe percura pa e inversionnan tuma luga den e organisacionnan hudicial local. “Mi ta kere esaki lo ta un stap sumamente importante,” el a bisa.

Relaciona cu e tema di reapertura di frontera cu Venezuela, Bon Dia a puntra Minister Tjon kico ta e problemanan hudicial principal cu ta mira. Minister a splica den cu contesta cu e reunionnan interno a tuma luga caba entre henter e cadena hudicial caminda tur e instancianan a traha pa un analisis di impacto pa wak kico nan mester tin na luga prome cu nan por bay over na e reapertura di frontera.

El a remarca cu e punto di salida di pais Aruba pa loke ta trata esaki ta cu nan ta bay haciele na un manera gradual y na un manera responsabel y pa e motibo aki e reunionnan interno ta asina importante. Awe lo tuma luga e siguiente reunion na Bureau Rampenbestrtijdeng Aruba caminda lo delinea e ultimo puntonan pa e comision ta full prepara pa inicia e reunionnan tecnico cu Venezuela pa wak con e apertura aki lo mester tuma luga.

“Ta importante pa splica cu obviamente tin riesgonan mara na esaki y pesey e ta asina importante cu nos ta bon prepara. Awe tambe nos a haya un presentacion amplio pa loke ta warda costa. Nan a splica nos e desaroyonan y nan tambe ta señala cu un reapertura eventualmente obviamente ta trece su riesgonan cune tambe,” el a agrega.

Por ultimo el a indica cu fin di luna e prome reunion lo tuma luga cu Venezuela den cuadro di esaki.

Pa loke ta e prome reunion pa trata e tema di reapertura, Minister Tjon a splica den un comunicado di prensa cu e reunion tabata uno sumamente informativo, caminda a toca te diferente proyectonan cu ta bay ser ehecuta e aña aki den cuadro di e landspakket. El a menciona cu actualmente tin miyones di florin disponibel pa por percura pa e procesonan ser restructura, y material ser cumpra pa tur e personal cu ta traha den e diferente departamentonan aki.

El a agrega cu tin espacio pa inverti den proyectonan infrastructural. Banda di esaki, el a indica cu nan a palabra cu lo sigui reuni un bes pa luna na Bureau Rampenbestrijding Aruba (BRA) pa di e forma aki nan por monitorea e avancenan mas di serca pa cu e proyectonan aki.

“Varios proyecto a ser aproba caba pa loke ta programanan tecnologico, asina por cu danki na esaki e servicio pa cu clientenan di Inmigracion Aruba ta bay ta mucho mas miho. Na mes momento, lo bay por monitorea e problematica di “overstayers” na un forma mucho mas eficiente y eficaz,” e comunicado ta remarca.

Den luna di december Gobierno di Venezuela y Gobierno di Hulanda a informa cu nan a yega na un acuerdo pa cuminsa cu e combersacionnan tecnico pa e apertura gradual di frontera cu a wordo cera pa presidente Venezolano, Nicolas Maduro na februari di aña 2019.

Den un entrevista cu reportero di Bon Dia Aruba a tene cu Adan Celis, prome vice-presidente di Fedecamaras di Venezuela, Celis a comenta cu den su opinion e fronteranan di e paisnan nunca mester cera pa motibo cu conflicto entre gobiernonan mester ta separa di interes general di e ciudadanonan.

“Fronteranan mester permanece habri no solamente pa e intercambio comercial, sino tambe pa e mesun hendenan. Nan tin nan famia na otro pais y e ceramento di frontera ta separa e famianan aki. Esey ta e trabou fundamental cu nos ta bin haciendo, sensibilisa e gobiernonan, e opinion publico y e mesun hendenan riba e importancia di reapertura di frontera entre e islanan Aruba, Corsou y Bonaire cu Venezuela,” Celis a indica. .