Durante e siman di 23 pa 27 di september, a tuma luga na New York e di 74 Reunion General di Nacionnan Uni (‘General Assembly’). Como parti di Reino Hulandes, Aruba ta forma parti di Nacionnan Uni y a base di esaki ta atende reunionnan aki.

Segun un comunicado di prensa, den e siman cu a pasa, Prome Minister Evelyn Wever-Croes a atende varios reunion riba e tema di Sustainable Development Goals SDG’s, Metanan di Desaroyo Sostenibel. Ta trata di e 17 metanan cu Nacionnan Uni a stipula pa crea un miho mundo pa 2030 cual Aruba tambe ta comprometi pa cumpli. Metanan manera combati pobresa y hamber, bon educacion, awa di calidad pa tur hende, posicion di hende muhe y oportunidad pa hende muhe.

E dos ultimo puntonan Wever-Croes a indica cu tabata esunnan di mas importante y a elabora mas hopi riba nan den varios reunion na unda cu a yega na palabracionnan hopi interesante. Nacionnan Uni por yuda Aruba desaroya maneho riba e tereno aki.

E tema di corupcion y bon gobernacion tambe tawata temanan importante di discusion den e reunionnan na Nacionnan Uni incluyendo digitalisacion y e-Government. Banda di varios reunionnan di Nacionnan Uni, Wever-Coes a reuni cu World Economic Forum (WEF) y cu e organisacion OECD na unda tambe a toca e temanan menciona y a haci palabracionnan hopi interesante.

Prome Minister, probechando tambe cu presente na e Asamblea General di Nacionnan Uni tawatin varios lider di diferente pais den region, a tuma e oportunidad pa reuni cu varios pa trata e tema di Venezuela. Prome Minister a reuni cu e Embahador di Reino na Washington na unda Wever-Croes a ricibi un actualisacion amplio riba e ultimo desaroyonan.

Tambe e mandatario principal di nos pais a atende un reunion riba tereno ministerial di Caribe cu Sub Secretario di Estado David Hale. Un reunion hopi importante cu a wordo trata tambe den cuadro di Reino.

Finalmente, un otro reunion di Reino cu a wordo atendi ta un reunion entre Su Mahestad Willem Alexander y Reina Maxima hunto cu e Prome Ministernan di e 4 paisnan di Reino Hulandes na unda a trata e relacion di Reino en general y e cooperacion entre e paisnan den Reino.

“Di parti di Aruba, mi a trece padilanti cu loke mi mester ta espacio y tempo pa nos cumpli cu e palabracionnan cu nos a haci pa asina nos saca Aruba for di e problemanan financiero. Mi a enfatisa cu Aruba ta bayendo den e bon direccion cu un economia creciente, turismo ta creciendo y desempleo ta bahando. Y pa loke ta trata e situacion financiero di nos pais, mi a indica na nan cu Gobierno actual a bin di deficitnan di 300 pa 400 miyon florin durante e Gobierno anterior. E Gobierno actual a baha esaki te cu 25 miyon florin e aña aki”, Wever-Croes a duna di conoce.

Awo Gobierno ta trahando riba e prome presupuesto balansa pa Aruba despues di hopi tempo. E presupuesto balansa ta pa 2020 caba. E punto aki tawata necesario y importante pa trece padilanti den e reunion pasobra e mal maneho financiero door di e gobierno anterior a causa hopi desconfiansa den Aruba di parti di Hulanda. Awe Aruba ainda tin di lucha cu e desconfiansa aki y bringa contra e desconfiansa cu a wordo crea door di e gobierno anterior y pone orden den e situacion financiero di pais Aruba.

“Mi ta mira atras riba un siman hopi intensivo y na mes momento hopi fructifero cu bon palabracionnan haci pa pais Aruba”, Prome Minister Evelyn Wever-Croes a duna di conoce.

Riba e potret: Secretario General di Nacionnan Uni, Rey Willem Alexander, Reina Maxima, 4 Premier di Reino, PM Evelyn Wever-Croes di Aruba, PM Leona Marlin Romeo di Sint Maarten, PM Eugene Rhuggenaath di Corsou y PM Mark Rutte di Hulanda. Tambe riba e potret, Minister Blok y Minister Kaag di Hulanda.