E areanan cu a wordo cubri ta Husticia, Social, Labor y Energia
Ayera, diaranson 28 di juli a sigui e reunionnan cu stakeholders cu formador en conexion cu formacion di Gabinete Wever-Croes.
Esnan cu a wordo invita pa reuni cu formado hunto cu Partido Raiz tawata Procurador-General, Bote ter Stege; Stichting End Child Abuse, Mijenou Tromp; Commissie Sexueel Misbruik Kinderen, Lisette Gomes; ATHA, Cindy Kelly-Mathilda y Director di Utilities, Richard Eman. E areanan cu a wordo cubri ta Husticia, Social, Labor y Energia.
Despues di e reunionnan, cada persona encarga a duna nan declaracion na prensa di e reunionnan cu a tuma luga y tambe a haya y contesta preguntanan cu tabata al caso y preguntanan adicional di prensa, segun un comunicado di gobierno.
Prome Minister Evelyn Wever-Croes a duna di conoce cu e reunionnan a bay bon y hopi intensivo na unda stakeholders a trece nan puntonan dilanti di loke nan ta desea pa e proximo gobierno tene cuenta cu ne. Prome Minister a expresa su satisfaccion di con tur e reunionnan a bay te cu awo y a duna di conoce cu tur e puntonan y feedback cu a wordo treci, lo tene cuenta cu nan durante e siguiente gobernacion. Palabracion a wordo haci pa continua reunionnan cu e diferente stakeholdernan den nos comunidad unabes Gabinete Wever-Croes wordo forma.
