Durante dia di awe casi sigur lo tin un reunion yama pa gerencia di TeleAruba cu entre otro trahadonan cu a labora durante di Carnaval. Segun Bon Dia Aruba por a comprende, awa lo a pasa e hemchi unda cu lo mester hala atencion di varios trahado di e canal di television.

Un di e temanan cu mas a hala atencion pa e temporada di Carnaval 63 tabata e famoso palabra ‘wakiendo’. Esaki a inicia ora cu durante transmision e hoben Marilienne Lyder lo a uza e palabra na varios biaha incorectamente segun hopi persona cu a reacciona riba medio social Facebook. Cos a bay asina leu cu linguista Ramon Todd Dandaré tambe a duna un splicacion amplio di esaki bisando cu e palabra ‘wakiendo’ no ta incorecto.

Situacion
Actualmente tin basta critica riba e canal di television pa motibo di lo a ‘kita’ sra. Lyder for di trabou. En realidad, e presentado no tabata traha directamente cu e canal, sino cu a busc’e pa traha pa e temporada. Na momento cu e la dicidi di laga traha un T-shirt cu e palabra ‘#wakiendo’ riba dje den forma di mofa, a notifica su persona despues di e transmision cu su servicionan ya no ta necesario pa e ultimo paradanan. Algo cu aparentemente lo a molestia e gerencia di TeleAruba ta cu sra. Lyder tabata bendiendo e T-shirtnan aki durante e cobertura di Carnaval manera un tipo di fundraising pa competencia di bodybuilding cu e lo ta participando na dje. Sra. Lyder no tabata “para” su so den esaki ya cu varios otro colega tambe a bisti e mes un T-shirt aki durante nan trabou.

Segun por a comprende di un fuente basta yega di e situacion, ta cu lo por bay tin consecuencia pa tur cu a participa den e cos aki. E fuente ta hasta splica cu posiblemente e ‘celebro’ tras di e T- shirt ta un persona renombra den mundo di farandula, cu ta labora na e dicho canal pero Bon Dia Aruba no por a confirma esaki. Apart di e caso aki, tin mas situacion andando manera entre otro tin rumor cu lo a haya un camarografo bebi durante ora di trabou. A busca manera pa confirma e noticia aki cerca gerencia di TeleAruba pero te na e momento aki no a ricibi un reaccion. Lo purba di haya contacto cu e director pa haya sa kico e situacion ta.

Nota di foto: E potret aki a wordo publica riba pagina personal di Marilienne Lyder