Ya caba a tuma luga dos reunion relaciona cu situacion di Post Aruba. E di tres reunion tabata programa pa e siman aki, pero el a wordo posponi eventualmente pa otro siman.

Mediador di Gobierno, Sr. Anselmo Pontilius ta intermedia den e reunion aki cu participacion di gerencia di Post Aruba y e dos sindicatonan cu ta representa e trahadonan di e empresa estatal aki, SEPPA y STA. E panorama di Post Aruba no ta mucho alentador. E compania aki ta haya un suma di placa anual basicamente den forma di subsidio ariba su presupuesto como sosten financiero.

Na prome luga, Mediador di Gobierno a recomenda pa redacta urgente un protocol cu por bisa riba e futuro di e trahadonan y e compania. Pero tambe cu riba e protocol ta wordo specifica kico por y kico no por denter di e condicionnan di trabao.

Den e reunion ultimo di dia 1 di december a palabra cu e mandatario encarga cu post, Chris Romero, lo bay internamente pa reconfirma cu e subsidio anual cu post ta haya ta continua intacto si of no entrante 2021.

Ainda ta den discusion si gobierno lo kita un 12.6% destina pa e fondo di solidaridad (FASE) for di e subsidio limita cu e compania estatal aki ta bin hayando for di e mesun gobierno. “Hasta ora cu e tabata intacto mes, ya caba tabata un problema,” segun Pontilius. Pues si tin reduccion ki consecuencia esey tin pa Post Aruba.

Protocol

E contesta aki mester bin otro siman dia 15 di december, ya cu e reunion programa pa e siman aki a wordo posponi ariba peticion di e director di post. Ya cu nan kier bay mas profundo riba e redaccion di un documento of protocol cu mester wordo firma.

Mediador ta mira un speransa pa por yega na e documento aki pa e sindicatonan por haya oportunidad pa bay interno cerca nan miembronan pa discuti loke ta futuro di e trahadonan y e compania.

Sinembargo Post Aruba su ingreso ta menos, pero tambe nan gasto operacional anual ta hopi mas grandi cu e sosten financiero cu nan ta bin hayando for di gobierno pa sigui draai.

E situacion di e pandemia di Covid cu nos y henter mundo ta pasando aden, a caba di afecta ainda mas Post Aruba su problema. Nan a tene dos reunion caba den cual den ultimo reunion celebra siman pasa, nan a invita minister Chis Romero kende ta encarga cu e compania estatal aki. E mandatario a duna un bista riba algun punto crucial relaciona cu futuro inmediato y sobrevivencia di Post Aruba.

Unabes cu director di Post Aruba NV, Guillermo Raymond a bati e porta di Mediador di Gobierno pa intermedia, e departamento aki di gobierno a propone mesora pa reuni cu tur e partinan envolvi pa evalua e situacion di cerca, ya cu ta trata di mas cu shen trahado na servicio di e compania aki. E ta un compania estatal cu ta conoci publicamente cu prome cu Covid caba, nan tabatin entre otro menos ingreso den su operacion.

Pa e motibo ey, Mediador di Gobierno ta insisti pa redacta formalmente un documento riba kico ta bay pasa cu e condicionnan di trabao. Considerando cu hopi trahadonan di empresanan estatal a entrega parti di nan salario y parti di nan beneficionan. Pero mirando tambe cu e cifranan cu director di post a presenta no ta duna perspectiva, segun Mediador di Gobierno.

Ademas e trahadonan tin un contracto colectivo (CAO) cu aunke el a vence tin condicionnan di trabao cu e compania estatal aki a bisa cu nan no por sigui aplica nan. Un beneficio tin di haci cu e 105 florin di aumento di salario pa aña di e trahadonan di post cu Gobierno a laga sa cu no por cumpli. Pero tin mas cu ta condicionnan di trabao existente den cual e compania ta bisa claramente cu no por sigui aplica mas.

Segun Pontilius mester redacta un documento hopi cla, ki tempo ta bin bek pa evalua e situacion di post. Pero mas cu tur cos cu e documento aki por duna un claridad pa e trahadonan y e compania su futuro mes. Entre otro, kico lo bay pasa cu Post Aruba N.V. E ta haya cu no mester keda den incertidumbre. P’esey ta hopi importante cu e partinan envolvi den e asunto aki ta den e mesun linea pa sa kico nan ta bay splica e trahadonan awor y pa futuro.