Presidente di parlamento Mervin Wyatt-Ras (AVP) no a duna nos un fecha concreto, sin embargo ta bisa nos cu pa comienso di otro siman ta bay atende e caso di minister Paul Croes den parlamento. E ta aclaria cu pa falta di contenido no a yama e reunion mas trempan.
Manera ta conoci, luna pasa riba 28 di maart instancianan hudicial a haci entrada na cas di minister di asuntonan social y labor Paul Croes. Esaki relaciona cu sospecho den caso grandi di corupcion di permiso andando den departamento(nan) di gobierno. Fraccion di MEP a haci un peticion pa un reunion publico cu caracter di urgencia pa trata e caso aki dos dia despues cu e entradanan hudicial a tuma luga. Miembronan di parlamento Marisol Lopez Tromp (Independiente) y Andin Bikker (PDR) tambe a firma un peticion pa convoca un reunion cu caracter di urgencia. E dos parlamentarionan a pidi pa prome minister ta presente pa splica entre otro dicon minister Croes a haya permiso di parti di Conseho di Minister pa e keda ausente pa un periodo sin consulta parlamento.
Presidente Staten: no tin nada concreto
Bon Dia Aruba tabata tin algun dia caba ta purba di tuma contacto cu e presidente di parlamento pa puntr’e pakico no a yama e reunion aki y ki dia e ta bay ta. Nos a topa cu ne na Wilhelmina Park durante ceremonia protocolar di dia di Rey anto acerca su persona cu e preguntanan aki.
Sra. Wyatt-Ras: “E reunion aki ta toch specifico caminda ta cu ta wordo puntra cierto cosnan anto kier papia di e minister sin tin nada concreto. No tabata tin nada cu el a wordo deteni of ningun documentonan kiermen esey ta haci cu tog bo ta tuma tempo pa bo wak si tin algo cu nos por papia concretamente.”
E ta sigui bisa: “Pasobra tin biaha nos ta den un reunion publico y bay solamente riba suposicion; locual bo a tende, locual bo a pensa y mi ta kere esey no ta e forma pa nos reuni den parlamento.”
E presidente ta splica Bon Dia Aruba tambe cu mester reuni den parlamento a base di contenido. “Ora cu tin diferente peticion, mi ta scoge pa esaki ora cu nan tin un contenido of ora cu e ta algo cu bo por basa bo mes riba dje. E reunion aki a wordo yama pa otro siman pues bo mira mi ta cumpli cu reglamento di ordo pa yam’e. Y e ora nos ta bay trata pa wak kico ta e diferente punto di bista di e fraccionnan pa asina nos por trata e asunto aki.”
