Reunion Presupuesto 2021 cu Parlamentarionan den funccion di Minister demisionario; Fraccion di AVP a bandona reunion despues di problema cu yenamento lista orado

E tabata e prome reunion publico pa diferente Parlamentario nobo y el a cuminza cu un protesta pafo cu a crea confusion riba e lista di orado pa e reunion pa trata Presupuesto 2021.

Ministernan Demisionario di Gabinete Evelyn Wever Croes tabata den Parlamento pa duna contesta riba preguntanan adicional pa Presupuesto 2021, despues di a manda algun contesta por escrito.  Ta un tratamento cu ta hopi laat, pasobra apenas tres luna pasa a entrega Presupuesto 2021 na Parlamento. Ley ta papia cu mester entrega e ley mas importante di Pais Aruba prome cu September 1 di e aña prome.

Sinembargo, e personal di limpiesa di SKOA a reuni pafo di Parlamento pa protesta cu nan posicion lo ta na peliger. Consequentemente hopi Parlamentario a drenta den sala mas laat cu 9’or y a haya cu e lista di orado a sera caba, conforme reglamento di ordo. Fraccion di MEP grandemente tabata consisti di Ministernan demisionario.

Parlamentario nobo di Raiz mr. Geoffrey Wever hunto cu lider di fraccion di MAS drs. Marisol Lopez Tromp a haci un peticion na e Presidente di Parlamento nobo mr. Edgard Vrolijk pa habri e lista di orado pa motibo di e protesta pafor. Sr. Vrolijk a bisa cu contrario cu den pasado, e, como ex docente, lo percura cu tur reunion cuminsa na ora, pero cu ayera a dicidi pa haci excepcion y a habri e lista di orado. “Cos ta cuminza cambia. Mi a traha manera meneer di scol. Nos ta cuminza 9’or.”

Aquanette Gun di Fraccion di MEP a habri e reunion cu preguntanan particularmente na Minister di Enseñansa, riba e huur cu ta paga pa ubica scolnan Frere Bonifacius, St. Aloysius Reina Beatrix y Julianaschool, mientras cu a basha e edificio di Frere Bonifacius abou. E Parlamentario tabata kier sa e huur cu Gobierno ta paga. Tambe e tabatin pregunta na Minister di Husticia riba e capacidad di Centro Orthopedagogico, Casa Cuna, Imeldahof pa asina tin mas espacio pa hobennan cu ta den problema social y cu husticia. Gun tabata particularmente interesa pa sa si Centronan di Bario ta cumpli cu e rekesito di entrega cuentanan annual, ya cu nan mester di subsidio pa yuda den e trabou na nivel social.

Geoffrey Wever di Raiz a remarka cu a haci varios pregunta por escrito pero no a haya contesta. Wever tabata kier sa e motibo real pakico no a entrega e Presupuesto 2021 na tempo. “Mester tin un splicacion mas amplio cu no ta djis e pandemia. Ta den e di siete luna den e aña coriente y ya a haci gastonan caba.” Wever tabata contento di a compronde cu e deficit ta menos cu a premira, pero e tabata kier si con e financiamento di Hulanda ta cana.

Wever tabata kier  sa mas di e status di debe di Serlimar, particularmente e debe na Servicio di Impuesto di Aruba, SIAD. E tabata kier e relatonan di e curator di Serlimar cu ta den surseance di pago.

Miguel Mansur di Accion21 a habri e ronda di pregunta, cu el a relata hopi na e agenda di ehecucion di e landspakket, accorda cu Hulanda. Na momento cu Minister di Finanzas y Economia Xiomara Maduro y tambe Prome Minister Evelyn Wever Croes a yega na nan turno pa contesta, ambos a mustra cu e trabou di e agenda di ehecucion actual ta particularmente analisis y estudionan cu mester produci datonan concreto pa despues negocia implementacion di maneho y medida nobo. Locual ta spera pa fin di Augustus ta presentacion di un pakete nobo di impuesto, cu ta sea un BTW of un ABB y mester tin un decision pa 15 di November 2021.  Minister Maduro a bisa cu e BTW lo reemplasa e BBO, BAVP y BAZV, pero cu e proceso aki lo tuma otro aña y mey pa keda introduci.  Lo pidi  IMF pa yuda den e proceso informativo na nivel nacional pa compronde e sistema nobo.

Miembro di fraccion di AVP Gerlien Croes a puntra kico ta e posicion di Gobierno riba e ponencia di College Aruba Financieel Toezicht, CAft, cu a bisa cu mester baha e gasto di salario di trahadonan publico cu 20 porciento y no e 12.6 porciento. “Con por splica pueblo di e recorte aki, mientras cu tin 8 miyon florin reserve pa vacaturanan nobo. Con ta splica na e werksternan di SKOA, cu tin 142 vacatura habri pero nan mester bay cas.” Croes a señala cu a tuma nota cu tin dos servicio nobo, esta Direccion Innovacion y Servicio E-Government y tabata kier sa e plan di formacion y cuanto trahado esakinan lo rekeri, ya cu e no ta inclui den e 8 miyon. Tambe Gerlien Croes tabatin pregunta riba e fondonan cu e testnan di COVID-19 a genera na aeropuerto y cuant trahado a tuma den servicio di DVG pa e period di pandemia.

Su colega di fraccion Mervin Wyatt Ras a bisa cu ta recientemente a haya oportunidad pa haci pregunta riba Presupuesto. El a bisa cu e por tin comprension cu a entrega e presupuesto laat, pero a presenta e ley hasta despues cu Gobierno a cay. “A haci uso di parti di e presupuesto y mey aña a pasa, sin cu departamentonan di Gobierno por a haci inversion mirando cu no a aproba presupuesto. Kico ta nifica cu no por a haci inversion,” tabata e pregunta di Wyatt Ras.

Marisol Lopez Tromp, lider di fraccion di MAS a bisa cu “ta enfatisa asina tanto riba regla y ley, pero pakico ta awor cu eleccion a pasa cu mester trata Presupuesto den dos dia.” Lopez Tromp a bisa cu Minister di Husticia por a warda un siman y pasa e proceso legal pa yega na e trucknan di brandweer y tambe e bulletproofvests pa polis, y a puntra pakico no por a warda riba e siguiente Minister di Husticia.

Riba e punto aki Minister di Husticia Demisionario Andin Bikker a splica cu tabata cuestion di tempo, pasobra mester a inicia un les pa KIA e siman aki y haci compra di truck pa brandweer, ademas di a duna compromiso pa un klas nobo por cuminza na Scol di Polis.

Marisol Lopez Tromp tabatin preocupacion specifico riba e asunto di abuso di mucha, abuso sexual di mucha y ta kere cu leynan di castigo mester refleha locual e pensamento ta biba den region.  Den region castigonan ta hopi mas pisa, compara cu locual ta e castigonan na Aruba. E lider di MAS a urgi pa inverti mas pronto posibel den e espacio y material pa atende cu entrevistanan di victimanan.

Tambe e lider di MAS tabata kier sa con e maneho di personal na despachonan di Minister lo ta, pa evita cu tin spirito ta traha, pero tambe cu ta percura cu tin exigencia di capacidad pa esnan cu mester conseha e Ministernan.

Lopez Tromp a expressa tambe preocupacion pa e condicion di e planta di purificacion di aw ana Bubali cu ta den un situacion deplorabel y cu si e kibra, lo nifica un desaster pa Aruba. E tabata kier sa di e maneho medio ambiental pa proteha coralnan y areanan cu a keda legalmente protehi.

Por ultimo, Marisol Lopez Tromp tabatin pregunta con e Presupuesto 2021 lo refleha e Ministerionan nobo y cuanto lo tin, sea ta siete, ocho of nuebe. “E Landsverordening Instelling Ministers, LIM, lo keda mescos?”

Lider di fraccion di MEP Rocco Tjon a papia di e necesidad pa proteha frontera di Aruba y tambe tabata kier a haya sa con e negociacionnan entre WEB y Eagle LNG tabata bayendo.

E cantidad di Parlamentarionan cu a hiba palabra tabata relativamente limita, mirando cu varios di e Parlamentarionan huramenta ta alabes Minister Demisionario, cu pa drs. Lopez Tromp en todo caso, ta motibo pa puntra si esaki no ta un conflicto di interes y ta algo contra Constitucion pasobra ta e mesun Parlamentarionan lo vota pa nan presupuesto como Minister Demisionario.

Locual sigur a corta e ora di debate tabata e hecho cu fraccion di AVP a bandona sala y ni e dos miembronan di e fraccion berde cu a participa den e prome tanda, a bolbe pa e di dos.