E declaracion cu diabierna ultimo, minister Marisol Lopez-Tromp a haci den Parlamento tocante casonan di corupcion na scala grandi di gobernacion, tabata asina contundente, cu e fraccion mas grandi di coalicion di gobierno, MEP, a pidi un reunion cu Prome Minister, Evelyn Wever-Croes, hunto cu henter su gabinete pa bin duna cuenta.
E ta un reunion riba topico specifico di corupcion. Igualmente preguntanan a bay pa e prome mandatario relaciona cu e iregularidad cu a tuma luga den e ministerio Desaroyo Teritorial, Infrastructura y Medio Ambiente, prome cu Sra. Lopez-Tromp a asumi e cartera aki
Lider di fraccion di MEP, Rocco Tjon a bisa cu nan a manda 45 pregunta pa e prome mandatario, ya cu – segun e mandatario Lopez-Tromp – el a yega di informa debidamente cu su coleganan di gabinete y tambe na prome mandatario tocante actonan coruptivo.
Te hasta documentonan el a yega di entrega na nan tambe y Parlamento kier wak e documentonan aki tambe. Pero tambe Parlamento kier sa kico premier Wever-Croes a conseha Sra. Lopez-Tromp, ora cu el a revela e actonan di corupcion cerca dje. Esta si e kehonan aki cu a wordo entrega ta wordo investiga. Of sea e notanan di maneho riba e pasonan cu a wordo tuma pa evita nan den futuro.
Bon Dia Aruba a puntra parlamentario Tjon cu unabes cu e asunto aki di corupcion ta wordo trata, si nan ta dispuesto pa haci denuncia den nos instancia competente, manera Ministerio Publico (OM). Mescos cu nan a yega di haci den pasado, mas tanto pa nan oponentenan politico.
Sr. Tjon a bisa cu pa e motibo ey nan a bin cu e preguntanan riba cuanto denuncia a wordo haci caba, y cuanto investigacion tin andando. Segun Sr. Tjon na 2018, nan fraccion a acudi na OM, caminda nan a entrega hopi informacion incluso di personanan cu ta liga na coalicion, pero no di MEP. E biaha ey loke nan a entrega tabata un rapport di investigacion, caminda e ta haya cu acto coruptivo a tuma luga relaciona cu otorgamento di tereno. Den cuadro di esey, nan a compila tur informacion y tambe a substancia esaki cu documentonan.
“Den e documento ey tabatin hendenan cu tabata afilia, manera Sra. Lopez-Tromp a bisa, na figuranan prominente di un partido,” el a bisa.
El a agrega cu si tin hende liga na su partido involucra den corupcion, sigur nan ta procede. Tur informacion cu nan lo sigui haya, si no tin keho formal contra nan, nan fraccion lo sa di encamina e keho of denuncia aki. Pero si tur informacion y documento di corupcion t’ey den man di gobierno, si no tabatin keho cu a wordo entrega, Sr. Tjon lo considera esaki lamentabel.
A pesar di e denuncia haci pa Sra. Lopez-Tromp, parlamentario Tjon no ta haya niun motibo pa nan fraccion mustra nan desconfiansa riba e coalicion. Ya cu e ta wak cu loke e mandatario a trece dilanti tin di haci cu ambtenaarnan cu a comete algun iregularidad cu mester atende cune.
Pero esaki ta, te hasta unda nan por wak. Pero si tin mas acto di corupcion, esey lo wordo atende den segunda tanda of den e reunion tocante corupcion cu henter gabinete. Pero si Sr. Tjon ta haya lamentabel cu prome cu Sra. Lopez-Tromp a bira minister, e tabata sinta hunto cu nan den sala di parlamento, y nunca nan a haya niun informacion.
