Minister di Husticia Andin Bikker a reuni cu e funcionarionan cu tin di haci cu e Pre-clearance Mericano na Aruba. Segun e mandatario, niun momento e tema di e permanencia di e facilidad aki pa migracion y duana Mericano na Aruba mes, a wordo treci dilanti.
Minister Bikker a bisa cu nan a reuni mas tanto den cuadro di uzo di e sistema di Happy Flow y con e instrumento aki lo por facilita e proceso di control, ya cu autoridad Mericano ta uzando un sistema di nan mes. Nan ta evaluando con nan por combina e dos sistemanan. Cierto aerolinea Mericano ta uz’e na Merca y nan ta interesa pa bin cu cooperacion cu nos pais. E ta kere cu pronto lo sigui avansa riba e proyecto piloto aki.
Segun e mandatario den e reunion aki nan no a atende cu e autoridad Mericano specificamente riba Preclearance, ya cu e no a bay reuni cu nan riba e tema aki. Mas bien minister Bikker a bisa cu Aruba tin hopi aña cu e facilidad aki cu ta algo positivo pa nos turismo. “Si tin cualkier preocupacion sigur nos lo por sali afo,” el a bisa.
E echo cu e por sinta cu e representante di e departamento cu ta atende cu e instancia Mericano aki, y mas bien nan a bay riba con nan por optimalisa e servicio, ta un bon señal cu e facilidad aki lo keda pa largo, segun e mandatario.
E reunion cu minister a sostene cu siman pasa a tuma luga den sede di embahada Hulandes na Washington. Tabatin presencia di diferente representantenan di departamento Mericano cu ta atende cu frontera y representantenan di departamento di Aruba pa atende cu e tematica di Happy Flow.
E ta un sistema cu ta aplica den aeropuerto caminda ta reconoce personanan a base di tecnologia di identificacion biometrico den e proceso di check in na momento di biaha. E ta facilita y haci mas eficiente y diligente e proceso di control electronico. Ademas e ta contribui pa e turista su experiencia na Aruba ta mas agradabel posibel.
