Ayera a tuma luga porfin (parcialmente) e reunion encuanto e practica di e ministro encarga cu Infrastructura encuanto otorgamento di tereno erfpacht. Desde januari di e aña aki e partido grandi den oposicion a pidi e reunion, cu urgencia naturalmente, pero manera custumber durante trinta aña caba, esey ta parce nada mas cu un bon ocasion pa e partido den gobierno haci bofon di oposicion y no tene e reunion. Pa nos suerte, nos como publico, e presidente di parlamento a bay na malo cu su partido y a declara su mes independiente. Esaki a libera e presidente di e obligacion cu e tabata sinti pa cumpli cu su partido den gobierno y cu tabata motibo pa no planea ningun reunion, pa cuanto cu oposicion kier a grita. Awor, algun dia prome cu e baha como presidente, el a bay haci aparentemente un ‘gesto generoso’ na oposicion y a yama e reunion.
Pero mientras tanto gobierno y fraccion gubernamental a ‘descubri’ e arma di no presenta den parlamento, lagando oposicion y e presidente disidente para pa payaso. Esey a sucede caba den e reunion suspendi encuanto e cambionan den Codigo Civil unda no tabata conveni ni ministro di Husticia, ni su coleganan di partido pa laga e reunion sigui. Aparentemente antayera tabata solamente un muestra di poder pasobra mas laat e parlamentarionan a presenta, pa e reunion inicia den un calor inmenso pasobra ‘pa casualidad’ hende malvado a corta tubo di airco di parlamento. E prome tanda a tuma luga dialuna, pero a posterga e reunion te diabierna proximo, ora e ministro cuestiona ta na turno pa contesta. No mester keda sorprendi si atrobe ta bin un of otro excuus pa suspende reunion, pa asina laga e parti cu falta tuma luga despues di apertura di aña parlamentario nobo, unda mayoria berde ta eligi un presidente nobo. Esey ta hiba nos di regreso na e situacion ‘normal’ cu un presidente cu na prome luga ta sirbi interes di mayoria gubernamental y no ta haci caso di otro banda di sala.
Y asina, nos por presencia atrobe loke nos tin tanto aña ta mira den parlamento, y esey ta un demostracion interminabel di poder di e partido den gobierno cu ta dicta tur cos cu ta pasa den e, supuestamente, organo mas halto di nos sistema democratico. Loke te awe tur esunnan envolvi no kier y por ta no por comprende, ta cu e demostracion di poder di e partido cu mayoria mester tuma luga na momento di vota! Pero mientras no yega na esey, mester sigui e reglanan di wega cu cierto respet, pasobra awe bo ta gobierno y mañan bo ta oposicion atrobe. Y manera den otro area di bida, bo kier pa hende trata bo manera abo ta trata hende. Lamentablemente den nos sistema parlamentario nos ta mira net lo contrario y esey ta cu ta uza delaster un medio disponibel pa chercha y haci bofon di esunnan na otro banda di e sala. E pregunta cu nos mester haci nos mes ta si e sistema ta bay keda asina of ta tuma paso pa mehora esaki.
E problema fundamental ta cu nos a hereda e sistema aki di Hulanda, unda tin un democracia hopi mas madura ta funciona. E madurez ey ta expresa su mes den un sin fin di regla cu no ta poni den ley, pa e simpel motibo cu ningun di esunnan envolvi ta hinca den su cabes pa haci su mes eternamente ridiculo, violando e reglanan di oro cu ta funciona sin nunca a mira papel. Ki dia na Hulanda un presidente di Tweede Kamer ta tribi di nenga reunion pidi pa oposicion, of ki dia parlamentario ta nenga di bin reunion pa percura cu no tin quorum? Al contrario, den un caso asina e presidente y e ministro en cuestion lo tin mas miedo di nan propio fraccion cu di oposicion.
Pero finalmente, kico ta e aspecto mas grave di e asunto? Esey ta cu ‘cueste lo que cueste’ e partido den gobierno kier tapa manera di opera di e ministro, hasta ora tin indicacion fuerte di hecho castigabel cometi. E hecho castigabel aki no ta e otorgamento di tereno riba su mes, sino e sospecho cu a crea un organisacion cu e meta pa comete delito. E hecho cu den cierto caso a exigi pago di un ‘contribucion social’ como condicion pa haya tereno, ta un di e indicacionnan. Ta aki ta unda un investigacion hudicial preliminar mester tuma luga, pa por lo menos establece si ta trata di caso isola, o cu ta trata di un maneho bon pensa y planifica, conscientemente violando ley. Sin embargo, conociendo nos parlamento y su tradicion crea den trinta aña di disfunciona, si acaso tin reunion diabierna proximo, esey lo ta pa bari cualkier proposicion di oposicion for di mesa. E otro problema grandi cu nos tin ta un ministerio publico di cual un gran parti di poblacion no ta spera nada, pasobra asina e experiencia den e añanan nos tras ta hustifica. Resultado: un sistema basa riba inmunidad y impunidad politico.
