Reunion no a cambia percepcion encuanto e ministro

Ayera nos por a presencia un reunion informativo den parlamento tocante e tema di criminalidad. Esaki mirando e situacion actual, unda ta tumando luga un ola serio di atraco. Si por papia di algun resultado positivo, esey a keda bastante limita. Esey pa cuminsa pasobra e reunion tabata solamente un asina yama “openbare bijeenkomst”, cual ta un reunion unda parlamentario por haci pregunta y ministro tin e responsabilidad di duna contesta. Loke no por haci den e tipo di reunion aki, ta debati y haci proposicion pa tuma accion den e asunto cu a keda trata, por ehemplo den forma di mocion. Esey solamente ta posibel den un reunion publico di otro indole cu ta brinda e posibilidad aki.

Claro cu no por a spera cu presidencia di parlamento, den e afan di semper pa duna proteccion na e ministro, a scoge pa e forma aki, unda e posibilidad pa oposicion interoga e ministro di un manera mas fuerte, ta keda limita. Esey ta un lastima, pasobra atrobe ta crea e impresion cu e miembronan di poder ehecutivo den parlamento por conta cu proteccion innecesario, pero cu tambe ta haci tur discusion tocante haci parlamento mas independiente totalmente irelevante. Aki no ta trata di cambia ningun regla di wega. Simplemente ta trata di un presidente cu no ta tuma, o no ta tribi di tuma su responsabilidad pa permiti oposicion cuestiona e ministro. E no mester tin miedo cu oposicion ta bay come e ministro bibo, pasobra, aunke demostra simpatia cu e ministro no ta un prioridad pa nos, nos ta kere sigur cu e ta bon capaz pa defende su mes den un debate asina.

Pero ban pasa pa e informacion cu a ser duna den e reunion. A desmenti cu na januari ultimo tabatin 24 asalto, algo cu a keda publica sin cu e base di e informacion tabata conoci. Loke si ta e caso, segun informacion oficial duna ayera, ta cu tabatin 14 asalto den e mesun luna aki… Pa haci un comparacion: aña 2016 a conoce un aumento remarcabel di atraco te nivel di total 60, bastante mas halto cu e añanan anterior. Laga nos spera cu e tendencia di januari ultimo no continua den e resto di aña aki, pasobra si ta asina, nos ta papiando un nivel di mas di 150 atraco pa aña, mas di dobel e cantidad di 2016, cu nos tabata haya asina preocupante caba.

Den e reunion a bin dilanti tur sorto di aspecto cu tin relevancia pa cu e tema. Suficiente material of no pa polis por opera, leynan cu mester adaptacion pa por facilita trabao di polis, maneho pa cu hende local cu ta yuda facilita delincuente cu ta bin di exterior, miho control na frontera, tanto na puesto oficial di entrada como na costa en general, colaboracion entre diferente entidad hudicial, etc. Tur esaki a bin dilanti, ademas di asunto manera mas personal pa polis, loke ta calcula na un 150 persona cu falta, mientras ta preparando un tanda nobo di 50 alumno na scol di polis. Conclusion?

Mester bisa cu e ministro a haci un intento di contesta e preguntanan, sin tanto di e afan di custumber di kier culpa tur otro menos asumi responsabilidad pa e situacion actual. Naturalmente no por a falta un regreso cortico na pasado pa proba cu e situacion den e periodo di gobernacion anterior tabata leu di ideal y cu varios problema tabata grandemente presente e tempo aya caba. Pero cu esey e tabata kier sorprende nos? Den tur pais na mundo cualkier ministro di husticia ta hereda mayoritariamente problema existente di su antecesor. E pregunta no ta ki dia e problemanan a nace, pero kico efectivamente e ministro en cuestion a haci den e tempo cu e ta na encargo di e ministerio aki pa combati e problemanan señala. Y ya den su segundo periodo di gobernacion y cu mas di shete aña tras di lomba caba, mester husga su actuacion y nada mas. No a tende mucho pa cambia e percepcion existente di nos di e ministro.

Loke en todo caso por conclui cu tin masha hopi cos cu no a tuma luga den e periodo pa cual e ministro aki ta responsabel. E por keha cu tempo di gobierno anterior Dimas a pasa pa otro ministerio, loke ta dificulta e comunicacion en berdad, pero ta kico a stroba su gobierno den tanto aña pa bolbe na e situacion anterior? Tal bes e no por mishi cu e ‘derechonan adkiri’ di su colega di Infrastructura? Acaso no ta asina cu den Reino tin apoyo pa Dimas bay di regreso pa Husticia, unda e mester ta, independiente di cara di e ministro di turno?

Pa termina un nota critico: pober di esunnan cu no sa Hulandes hopi bon y ta purba sigui e deliberacion den parlamento. Tanto ministro como su ayudantenan ta papia continuamente di por ehemplo “gebruik di vuurwapens” y “dadergerichte aanpak”… Por ta cu nos por emplea traductor simultaneo o pone sub titulo bao di e imagennan di parlamento? O ta mas barata manda nan tur un curso di Papiamento?