Vice presidente interino y general di Citgo Aruba Refining N.V. (CAR), sr. Joe Crawford, a duna contesta riba un carta cu presidente di FTA, Hubert Dirksz, a manda dia 31 di december ultimo pe.

Den su carta, FTA ta pidi atencion urgente di CAR pa haya aclaracion riba e situacion di e trahadonan, despues cu a wordo anuncia cu refineria ta stop su actividad pa fin di januari awor.

Den e carta aki FTA a informa CAR cu nan no ta conseha niun di nan miembronan pa acepta cualkier oferta di retiro, si no tin claridad riba e posibel continuacion parcial di nan acuerdo laboral cu un operador nobo di e refineria y/of terminal petrolero.

FTA y nan miembronan ta haya cu CAR no por ofrece pakete di retiro y bin cu fecha limite pa acepta nan, sin duna prome niun informacion relaciona cu e continuacion di trabou. Nan ta haya cu CAR no ta cumpliendo cu ley y obligacion, manera un bon dunado di trabou. Esaki ta crea un gran incertidumbre entre nan personal, locual ta totalmente inaceptabel.

Carta di Citgo.
E matutino aki a haya acceso na un carta cu CAR a manda pa FTA cu fecha 3 di december ultimo, caminda CAR a laga sa cu nan a haci tur loke ta posibel pa reuni cu Refineria di Aruba (RdA) cu gobierno di Aruba pa asina discuti e transferencia di e refineria y instalacion di e terminal pa RdA.

Igualmente den e carta menciona CAR a informa FTA cu di parti di RdA y gobierno di Aruba, nan a pidi pa CAR despedi y bin cu un areglo cu tur trahado den nan servicio, prome por tuma cualkier transferencia. E informacion aki a wordo comparti cu FTA caba den e carta cu CAR a manda pa e sindicato y empleadonan dia 27 di december ultimo.

 

CAR ta insisti cu te awor nan ta bin cumpliendo cu nan obligacionnan legal como un ‘bon dunado di trabou.’ Y apesar di e solicitud cu FTA a haci na nan, CAR a laga sa cu solamente nan por comparti informacion cu nan tin disponibel. Den e caso aki CAR no por papia ni pa RdA y tampoco pa gobierno di Aruba. Sinembargo, CAR a laga sa na FTA cu nan lo sigui haci tur loke ta posibel pa reuni cu RdA y gobierno di Aruba pa debati riba un transaccion ordena di e refineria y instalacion di e terminal. E texto na Ingles ta bisa textualmente asina:

Dear Mr. Dirksz, we received your letter dated december 31, 2019. Citgo Aruba Refining N.V. (CAR) has made every affort to meet with RDA and the Government of Aruba to discuss the transfer of the refinery and terminal facilities to RDA. RDA and the Government of Aruba maintain that CAR should severance all the employees. This information was shared with FTA and the employess on december 27, 2019. CAR has therefore complied with its legal obligations to behave as a ‘good employer’. CAR can only share the information that it has available and cannot speak for RDA or the Government of Aruba.

Nevertheless, CAR continues to make every effort to meet with RDA and the Govermment of Aruba to discuss an orderly trasition of the refinery and terminal facilities.