Tur luna Minister Maduro ta reuni cu e hefenan di departamento di e ministerionan di finanzas y economia pa asina por mantene e synergia necesario pa facilita gobernacion di nos Pais. E luna aki a toca temanan manera con COVID19 ta afecta e departamento su funcion, e situacion cu Hulanda y presupuesto 2021.
“Cooperacion entre instancianan gubernamental ta importante pa Aruba por sali fuerte bek fo’i e crisis. Synergia ta facilita gobernacion. Como gobernante ta hopi importante pa por tin contacto regular cu tur hefe di departamento pa asina por coordina e trabounan cu tin cu wordo haci na bienestar di Aruba”, minister Xiomara Maduro a bisa den un comunicado di prensa.
Maduro ta reuni tambe regularmente cu Presidente di Banco Central pa asina combersa riba e trabounan cu ta wordo haci pa Gobierno y Banco Central pa sigura e stabilidad y integridad di Aruba su sistema financiero y economico.
“Na nos Pais awor mas cu nunca instancianan mester comunica, traha y coopera cu otro pa asina Aruba por bay sali fuerte atrobe fo’i e situacion di crisis cu nos ta aden. Aruba semper a conta cu un forza di coherencia y awor ta ora pa nos mustra cu nos trabou conhunto cu nos tin e boluntad y forza pa sigui yuda nos Pais progresa”, segun e comunicado ta finalisa.
