E politico di POR y parlamentario, Andin Bikker a bisa cu e proceso di formacion di un gobierno nobo, caminda su partido lo forma parti di dje, ta canando. Sr. Bikker a clarifica cu e no ta prefera e palabra di yabi pa cualifica partido POR, sino mas bien cu nan ta instrumental pa forma un gobierno nobo.
Igualmente el a re afirma cu POR a pone su disponibilidad pa forma parti di e gobierno cu lo sinta pa 4 aña. E proceso ta andando. El a agrega cu manera ta publicamente conoci tabatin reunion cu a tuma luga e siman aki, despues di e rapport cu Informador a duna diabierna ultimo.
E number 2 di partido POR a laga sa cu nan a enfatisa cu nan ta habri pa forma un gobierno cu partido MEP. Nan no ta limita nan mes di explora bou condicion hopi stricto pa amplia esaki cu partido RED pa tin un gabinete mas amplio cu ta posibel y nan a exclui partido AVP.
Aworaki e proceso normal ta cu lo bin e nombramento di un formado di parti di gobernador. Te hasta unda nan sa, ainda e decision aki no a cay. Nan tabata na spera cu eventualmente ayera mes e Formado lo a wordo nombra. Sino den e dianan aki e Formado ta wordo nombra oficialmente.
E tarea di formado ta bay ta a base di tarea di formacion pa bay haci su esfuerso pa forma un gabinete. “Nos den todo caso ta disponibel. Nos a duna plenamente conoci kico ta e parameter nan. Cual ta e partido of partidonan cu nos por visualisa cu nan lo por forma un gobernacion cu ne”, segun sr. Bikker.
