For di 8or te 10or di mainta, un grupo di empleadonan di e sector publico a bay atende e yamada cu e bloke sindical (SEPPA, SIMAR, SPA, SADA, TOPA), a haci pa un reunion informativo riba indexering.

E reunion aki a tuma luga den un sitio publico na Wilhelmina Park, cu presencia di polis pa garantisa ordo publico. Aunke e tabata un reunion basta trankil, caminda e lidernan sindical a trece dilanti e proposicion y contraproposicion durante e reunionnan cu nan a yega di sostene cu gobierno. Tambe den e reunion aki algun di nan miembronan a vocifera nan opinion. Tabata bisto cu e mayoria di esunnan presente tabata prefera placa di indexering y no ATV dag.

Proposicion.
Vocero di e bloke sindical, Edward Maduro (SADA), a referi na e ultimo proposicion cu nan a ricibi di gobierno, durante nan reunion di diabierna pasa. Un proposicion cu nan a considera como insulto. Nan tabata cla pa bin cu un ultimo proposicion pa gobierno, pero na final nan a dicidi pa cada sindicato analisa e proposicion aki den nan propio seno cu nan miembronan. Esaki debi cu tabatin empleadonan cu tabata pro y un grupo mas grandi –specialmente integra pa maestronan– cu tabata contra.

Maduro a trece dilanti e proposicion cu nan kier presenta na gobierno, di 85 florin di indexering y dos dia liber of ATV dag di compensacion. Prome cu esaki, e bloke sindical a yega propone gobierno pa paga un indexering di 101 florin den salario. Pero ya caba gobierno a rechasa e proposicion aki, bou e argumento cu nan espacio financiero ta limita.

Maestronan ta contra.
Presidente di SIMAR, Josephine Martilia-Albertus, a purba di aclaria su miembronan presente –cu tabata mayoria y contra e proposicion ultimo cu e bloke sindical kier a trece cerca gobierno– caminda el a bisa cu den un negociacion asina no tur ora e ta un full ‘win-win’.

Nan ta consciente cu e gremio di docente ta ‘perdiendo hopi’, pero cu e proposicion ultimo aki, a lo menos nan kier haya algo. P’esey Martilia-Albertus a splica cu nan a sinta hunto como bloke sindical, ya cu nan a yega pidi 101 florin, caminda 2.4% nan ta hay’e na placa y den salario. Pero el a bisa cu gobierno a bin cu otro proposicion di 5 florin cu 76 cen, cu nan ta considera practicamente nada.

P’esey nan hunto como sindicato di sector publico a dicidi di pidi 85 florin (2%) di indexering den nan salario. Nan ta baha casi 15 florin, pero a lo menos nan por haya algo for di 101 florin. Pa compensa e resto (0.8%) nan a dicidi di bin cu 2 dia di ATV dag.

Esaki a pesar cu e 2 dia di ATV dag aki pa SIMAR no tin sentido, debi cu como docente, nan no tin e flexibilidad cu otro empleadonan na servicio di gobierno tin pa por uza nan. P’esey e docentenan preferiblemente nan kier placa y no ATV dag.

El a splica cu e maestronan por haya e dos dia di ATV dag na december hunto cu e 3 dia y mey (3.5) cu nan ta bin hayando caba y cu ta bira 5 dia y mey (5.5) dia liber paga. Sinembargo, Martilia-Albertus, ta haya cu mirando e parti di union sindical, nan a bin hunto. Aunke como maestronan nan lo por resulta mas afecta, pero nan mester tene cuenta cu nan ta un grupo uni.

Na final, y mirando e discusion cu a surgi, Secretario General di SEPPA, Magaly Britto a propone pa cada sindicato bay internamente pa delibera riba un proposicion cu por ta mas factibel pa tur hende. Como sindicato nan mester tene cuenta cu opinion di tur hende, aunke no semper nan lo por cumpli cu e deseo di tur.

Brito a declara cu ta mas na su luga pa e dirigentenan para keto un rato, reuni y tuma su tempo, pa asina analisa tur proposicion y wak cual ta esun cu por funciona miho pa tur hende.