Ayera Conseho di minister di reino y Minister Plenipotenciario Guillfred Besaril a reuni pa delibera di diferente tema encuanto di e situacion actual di coronavirus.
E mandatario a bisa cu e situacion ta diferente pa cada isla y por ehempel na St. Maarten e necesidad ta hopi mas grandi cu e otro islanan, e motibo di esaki ta cu St. Maarten ainda ta recuperando di e golpi basta grandi cu e isla a haya di dos horcan na 2017. Tambe RMR a papia riba ayudo militar y con esaki lo por bira efectivo na momento cu esaki bira necesario. ‘Papiando di actividad militar na nomber di pais Aruba e mandatario a trece padilanti na minister di Defensa Ank Bijleveld cu e paso tuma pa Merca pa pone movecion militar den Caribe y kico esaki lo trece pa Caribe. Minister Bijleveld a keda di comunica cu e embahador di Merca na Hulanda pa asina nos tin un miho bista kico e accion militar aki di parti di Merca ta nifica pa resto di region Caribense,’ e mandatario a bisa.
Besaril a sigui bisa cu pa loke ta trata region Caribense, Nacionnan Uni dos dia pasa a trece dilanti nan preocupacion pa loke ta e limitacionnan natural di e region cu tin un frontera di awa y cu nan ta mira tambe riba e poco recursonan di e islanan.
Na final Besaril a bisa cu a toca e tema cu ta esun importante pa loke ta pais Aruba. Besaril: ‘No menos y mas importante cu e otro problemanan cu a keda trata, pero tambe un preocupacion enorme pa nos isla cual ta e aspecto financiero. Riba esaki nos a palabra cu otro cu nos lo sigui e dianan aki den combersacion estrecho entre e diferente ministerionan di Finanzas pa asina aki otro siman nos cuminsa yega na decisionnan concreto kico ta bay ta e ayudo; con e ayudo aki ta bay tuma luga y ki tur e ayudo financiero ta bay encera,’ segun declaracion di Besaril.
E mandatario a finalisa na bisa cu e corona virus aki ta toca tur sector den nos comunidad y cu e ta un guera contra un virus cu a pone mundo henter na rudia y awe mundo lo mester mira con ta lanta cabes y para riba nos pia bek.
