Parlamentarionan di Aruba a probecha e ocasion ultimo di Parlatino na Cuba pa asina haya un bista general riba e desaroyo legal cu a ta tumando luga den otro paisnan pa legalisa uzo di cannabis. E reunion riba e topico aki a wordo posponi te luna di october ya cu tabatin algun discrepancia. Nan lo tin un reunion di Parlatino mas profundo riba e topico aki.
Recientemente parlamentario Endy Croes (MEP) a bay Cuba pa tres dia pa atende e reunion di Parlatino aki, unda nan a pone den consideracion e topico di legalisacion di cannabis. E ta contento cu proximamente e topico aki lo wordo trata den profundidad den Parlatino cu pruebanan cientifico. “No ta locual ami a bisa…”, e di. Nan ta na spera di hopi documento di credibilidad cu ta wordo sosteni cientificamente pa estudionan cu ta wordo haci riba marihuana pa uzo medicinal. A base di esey lo wordo traha un cuadra di ley caminda cada pais miembro ta bay bek den nan respectivo parlamento pa traha un concepto di ley, ya sea aproba of desaproba e uzo di marihuana.
E ta contento di por a conoce cientificonan Cubano cu a haci un presentacion den e ‘capitolio’ of palacio presidencial, unda nan a mustra e desaroyo di Cuba riba tereno di medicina. Nan a bin cu e informacion aki pa comparti cu nos ministerio di salud. Cuba ta forma parti di un grupo di 18 pais cu ta desaroya remedinan nobo.
Algo cu a hala atencion di parlamentario Croes ta un tratamento nobo pa pashentnan diabetico, considerando cu nos tin un poblacion grandi di persona cu ta confrontando e tipo di malesa di salud aki. E ta convenci cu na momento cu parlamento di un pais ta paga pa representa bo pais pa haya experiencia riba cualkier tema internacional, ta deber di cada parlamentario pa a lo menos duna un splicacion di locual a wordo trata.
Uzo cu fin medicinal di marihuana lo wordo trata den su totalidad na luna di october venidero ya cu den e mesun seno di Parlatino na Cuba tabatin un diferencia grandi. Entre otro riba informacion cu parlamentarionan di Chile y di Panama a trece cu nan, y cu tabatin sosten riba estudio cientifico haci pa Israel. Segun parlamentario Croes, e dos postura presenta ‘no ta cuadra riba e mesun nivel’. A wordo dicidi pa aplasa e reunion aki pa cuater luna pa asina acumula mas informacion pa trata e tema aki mas den profundidad.
Parlamentario Croes a referi na experiencia di e pais Uruguay cu si a aproba pa medio di su parlamento e uzo di marihuana medicinal. Uruguay a ‘bay un poco mas leu’ ya cu nan a aproba tambe e uzo recreacional. Segun e parlamentario Croes, esey den nan concepto no ta e parti cu ta toca nos. Sinembargo e topico ta hinca actualmente den e programa di gobernacion actual (MEP-POR-RED).
