Gobierno saliente no kier comprende integridad

E prome reunion di parlamento den su constelacion nobo lo no gana premio di beyesa. Atrobe emocion tabata hunga un papel estelar, mientras cu argumento sensato mester a tuma segundo luga. No cu nan tabata ausente, pero specificamente di banda di e partido opositor, nos mester custumbra ainda cu esey ta partido AVP, nan tabata haci falta grandi. Y esey ta decepciona, pasobra personanan cu a sinta ocho aña como ministro,mester por spera cu nan ta mustra mas nivel. Pero al contrario nan tabata comporta nan mes manera berdadero parlamentario Arubano, pero old style.

Esun cu a mantene cierto nivel den su actuacion tabata prome ministro Mike Eman, pero tambe a faya pa bin cu argumento al caso pakico e proceder cu gobierno a tuma den e caso Ibis tabata esun corecto. E colmo tabata ora el a describi e ministro encarcela como un victima… Victima di kico? Di un sistema hudicial cu por fin a yega na haci su trabao, algo cu nos tabatin hopi aña sin mira? Victima di oposicion (anterior) cu ta haya cu e mester a tene honor na su mes, y si e no ta hacie, mester tin un manera pa laga sa cu e no por sigui funciona?

Tambe nan argumentonan tabata cu e mayoria nobo ta practica persecucion politico y ta carece di  sentimento humano, hasta a yega na papia di derecho humano di e persona encarcela cu supuestamente no a ser respeta. Si e ultimo aki tabata e caso, anto lo tabata logico pa cuestiona e ministro actual (demisionario) riba e asunto ey, pasobra lo ta autoridadnan hudicial bao di su mandato cu ta violando derecho. Pero ta logico tambe cu e conocedonan di e materia aki no a pensa asina leu. Bo no por exigi responsabilidad di un gobierno cu no ta forma ainda, ta e ministro demisionario mester responde pa esaki.

Tambe a bin dilanti e pregunta pakico na e momento aki, mientras cu e gabinete ta demisionario caba, y por lo tanto e ministro sin cartera tambe, a haya necesario pa tene e reunion aki. Un pregunta logico; por a laga e asunto descansa y procede na forma gobierno nobo. Esaki en todo caso ta parce un cuestion di dia solamente ainda, mirando e acuerdo firma ayera tardi na Hooiberg entre e tres partidonan actualmente den negociacion, di cual nos no tabatin e detayenan ainda pa por duna un prome analisis.

E punto di bista di e tres partidonan formando gobierno ta cu nan tabata desea di coregi loke algun luna atras no a bay bon. Entre otro introduccion di e ministro sin cartera, mientras cu den esey constitucion ta categorico, cu un ministro mester ta un ministro cu cartera. Si laga e asunto asina, ta laga e precedente keda existi cu ta posibel pa ignora constitucion y crea legislacion oportunista segun conveniencia politico.

E statement cu mayoria parlamentario a haci ta cu a mustra cu e forma di actua aki tabata incorecto, aunke el a conta cu aprobacion di mayoria e tempo ey.

Cu esey e asunto a caba? Nos ta kere cu no, y cu ta necesario pa trece mas claridad den esaki. Si no, despues nos ta den mesun situacion atrobe, unda cu cada gobierno por actua segun nan ta haya ta bon. Di tur manera e no ta bay ta facil nunca, pasobra tin diferente pensamento di kico ta integridad. Un momento comico durante e debate tabata ora e ministro demisionario di Infrastructura a trompica grandemente y casi simbolicamente riba e palabra ‘integridad’. Aparentemente no ta pertenece na su vocabulario diario.

Pero pa bolbe na e asunto central mes: no ta facil pa defini den ley bon cla ki ora un ministro mester baha, pasobra semper tin caso cu no ta cay den e cuadro defini pa ley, pero cu ta apela na sentimento di etica y moral cu renuncia o retiro ta lo corecto pa haci.  Y ta na parlamento pa husga cu e momento a yega pa bay. No ta pornada cu den un pais cu un tradicion democratico asina largo manera Hulanda no a yega na formula legislacion hopi estricto. Pa e simpel motibo cu hopi prome cu e cos yega asina leu, ya e parlamento lo a tuma su responsabilidad y duna e mandatario en cuestion di conoce cu e no tin confiansa mas di parlamento, unda muy probablemente hasta su mes partido lo a dun’e di comprende cu miho e tuma su retiro, prome cu e hay’e.

Si nos traslada e caso Ibis y e mandatario envolvi un rato pa Hulanda, lo a sucede, inmediatamente despues di e invasion den su cas, y e anuncio di e sospechonan cu ministerio publico tabatin, di soborno, labamento di placa y traficacion di hende, na e momento ey caba como mandatario bo a causa asina hopi berguensa, cu bo ta tene honor na bo mes y bo ta entrega bo retiro, prome cu bo hay’e di parlamento. Tur loke a haci pa purba scapa e persona, ta  un insulto grandi pa e pais. A bira obvio di e reunion di ayera cu e nocion aki no a ni sink in cerca e fraccion di AVP.