Un biaha mas gobierno, den e caso aki ministerio di Husticia, ta bira e anfitrion di un reunion di consulta na nivel di Reino riba e tereno di husticia e siman aki.
E lo bira un reunion parcialmente virtual, ya cu minister di Husticia di Corsou tabata programa pa yega ayera tardi na Aruba. Kiermen Aruba y Corsou ta asisti fisicamente na e reunion aki, caminda minister Andin Bikker lo presidi e reunion aki. Mientras cu minister Bikker otro coleganan di Hulanda y St. Maarten, pero tambe e Secretario di Estado Sr. Knops ta bay atende e landen overleg semi-virtual aki.
Agenda
Tin diferente punto di agenda cu e mandatario den cuadro di cooperacion di husticia di paisnan di Reino lo keda di amplia riba nan den transcurso di siman. Un tema tin di haci cu e reforma cu ta contempla den e landspakket cu Aruba a firma na luna di november ultimo. Pero tambe lo trata riba punto specifico cu Aruba a yega di presenta.
E mandatario a referi cu varios biaha coast guard ta dedica oranan y dianan largo den labor di buskeda y rescate di piscadonan cu a disparce. E situacion aki ta bira un reto ya cu mester reconstrui tur e trayecto di e boto cu a presenta problema. Mientras cu ministerio di Husticia di Aruba a propone pa bin cu un proyecto piloto.
E ta consisti di un device of aparato pa e piscadonan cu por bin na remarca pa haya un localisador personal of GPS. E aparato aki ta pone e persona aki den e posibilidad cu sin nan ta confronta algun problema riba lama, nan por activa e aparato aki locual lo por facilita nan buskeda y rescate.
