Ayera a wordo trata e presupuesto di prome minister di asunto general, Evelyn Wever-Croes. E tabata e delaster ministerio pa loke ta trata  presupuesto 2019.

E  ley aki, cu ta reporta un entrada stipula un deficit financiero di 25 miyon florin (0.5% di nos GDP)  a wordo someti na votacion prome cu parlamento ta baha cu reces diabierna awor.  E tabatin alrededor di 15 mocion cu a wordo entrega, cu a wordo someti na votamento y tambe e ley mes. E tratamento di e minister di Asunto General, Innovacion y Energia a sosode despues cu diamars ultimo, den oranan di merdia, e reunion pa tratamento di presupuesto 2019 a keda suspendi pa varios ora,  debi cu no tabatin quorum.

Coalicion t’ey 

Ayera nos por a mira cu tur miembronan di e fraccionnan cu ta sostene gobierno tabat’ey.  Te hasta  e unico miembro di e fraccion di RED, cu no a presenta mas for di diabierna ultimo, tabata t’ey. Parlamentario Ricardo Croes no a raporta mas na parlamento despues di un discusion fuerte –te hasta cu nan propio coleganan di coalicion–  rond di legalisacion of depenalisacion riba uzo di cannabis.  Segun sr. Tjon, e miembronan di e fraccionnan di coalicion lo t’ey pa tur reunion cu lo tuma luga prome cu reces.

Pa resolve e situacion aki – y mirando cu oposicion a abstene di atende e reunion– fraccion di MEP mester a bay busca parlamentario Daphne Lejuez, prome cu e ta aborda e avion hunto cu su famia pa bay Hulanda di vakantie. Mientras cu otro miembro di parlamento, Ricardo Croes (RED), kende ta sostene e gobierno di coalicion,  tabata ausente eventualmente pa kebrante di salud.

Lider di fraccion di MEP  a declara na e matutino aki cu e mes no sa nada di un eventual impasse rond di e topico di uzo di cannabis medicinal cu e parlamentario di RED. “Nos no ta wak niun impasse.  Sr. Croes t’ey awe. Mi ta kere cu el a recupera di su salud, y esey ta algo positivo,” el  a bisa.  Sr. Tjon a laga sa cu despues cu diabierna nan colega di coalicion di RED, Ricardo Croes no a presenta na parlamento te ayera. Sinembargom nan no tabatin niun reunion personal pa aclaria e asunto aki.

‘Wega politico’

Lider di fraccion di MEP, Rocco Tjon  a declara na Bon Dia Aruba cu tur dia e tratamento di presupuesto 2019 a bay bon, pero si nan tabata seccion hopi largo. E ta haya cu e nivel, tanto di nan  mes como di oposicion, tabata bon pa trata e ley aki. Sinembargo, loke sr. Tjon a lamenta ta e situacion cu a surgi diamars ultimo, cu a haci cu e deliberacion no por a sigui, debi cu no tabatin e mayoria exigi di e mita plus 1 –kiermen 11 parlamentario minimo– pa sigui cu e reunion y menos pa aproba niun ley.

E lider di fraccion di MEP a cualifica esaki como  un ‘wega politico’ cu a wordo haci di parti di oposicion pa frustra e eficiencia y continuacion di e reunion.  E por scucha cierto argumento di e fraccion di oposicion cu MEP a yega di haci mesun cos den pasado. Si partido MEP a yega di haci esaki den pasado,  e parlamentario aki tampoco e ta hay’e  bon,  ya cu e ta diferencia su mes di e actitud aki. Sr. Tjon a indica cu su fraccion ta integra pa 8 parlamentario nobo, lagando un banda sr. Juan  Thijsen como presidente di parlamento, ya cu den su funcion e  no ta debati.

E ta hay’e lamentabel y te hasta ‘infantil’, pasobra na final di dia e ta costa placa pa pais Aruba, debi cu hopi profesional mester keda overtime, polis mester keda traha te laat debi cu e reunion a keda tranca pa casi cuater ora.  E ta haya esaki innecesario, debi cu a pesar cu e parlamentarionan di coalicion,  Lejuez y Ricardo Croes no tabata t’ey, tabatin parlamentario suficiente presente.

Pero esunnan di oposicion a nenga di  drenta den sala  di parlamento, y no tabatin quorum.  Por cierto, sr. Tjon ta considera cu un punto cu sigur nan lo bay traha otro aña tin di haber cu e adaptacion di e reglanan di ordo di parlamento, ya cu e ta hopi anticua, entre otro pa atende cu e discusion rond di quorum.

El a declara cu si oposicion tabata contra di e ley di presupuesto, nan por a drenta sala di parlamento pa sigui debati, y splica dicon nan ta contra dje. “Pero no djis  keda sin bin den sala pa frustra full e proceso di e reunion.”  El a agrega cu  nan tabatin  palabracionnan haci cu oposicion pa medio di un comision.