Reunion cu sindicato y gremio a bira informativo; No por a formula posicion sin documento na man

Ayera mainta, gobierno a cuminsa su ronda di consulta cu sindicatonan y gremio comercial, tocante e ultimo condicionnan cu Hulanda a bin cune pa brinda ayudo financiero pa pais Aruba atende cu e crisis Covid. Atardi gobierno a tene otro ronda di reunion cu e lidernan politico di diferente partido.

Na final e reunion aki a bira uno mas tanto informativo. No tabatin un consenso general, y tampoco un posicion riba Hulanda su exigencianan. Bon Dia Aruba por a ripara si cu tabatin un bon concurencia di e representantenan di cada sindicato y gremio invita.

Participacion

Tanto representante di sindicato y gremio comercial a haya 3 minuut pa bin cu palabra, pregunta y/of bin cu un remarca na final di e reunion informativo.

Despues di scucha e presentacion haci tanto pa premier Wever-Croes como di e directornan di departamento di Finanzas como di DWJZ, nan tur a conclui cu Aruba su situacion ta dificil y practicamente nos ta entre spada y muraya pa acepta e condicionnan di Hulanda, y no tin alternativanan.

Un expresion unanime tabata cu dificilmente nan no por a duna un posicion, debi cu e documento no ta disponibel. Ya cu segun reglanan di conseho di minister di Reino, e documento aki no por keda publica prome cu e wordo trata.

Sr. Valdez di e organisacion di pensionado OPPA a lamenta cu un documento di e embergadura aki ta uno secreto, ya cu ta dificil pa nan por duna nan opinion riba dje. Tambe el a bin cu pregunta: dicon Hulanda a pone Aruba den un situacion asina? Y si esaki ta expresa nan falta di confiansa riba nos gobierno. Tambe presidente di sindicato di hospital (ABV), Gina Maduro a puntra pa mas informacion riba BTW. El referi cu den prensa a keda publica cu lo introduci BTW di 12.5%.

Sinembargo algun sindicato manera STA a expresa su solidaridad cu gobierno. Mientras cu sindicato SEPPA a haya cu independiente di e gobierno cu ta na mando, nan tur mester uni pa mantene un posicion firme riba e forma cu Hulanda kier impone e medidanan aki. Te hasta sindicalista Magaly Brito di SEPPA a solicita pa bin cu un documento pa asina hunto expresa nan disgusto na Hulanda. Pero na final e propuesta aki no a haya curpa… ainda.

Igualmente algun di nan a yega di expresa, manera ATIA, cu e reforma y cambio cu Hulanda kier bin pa Aruba no ta totalmente malo. Es mas, ya caba e tabata wordo premira prome cu e crisis di Covid a dal nos. E mesun opinion aki a wordo expresa pa Hubert Dirksz di FTA.

Tisa LaSorte di AHATA ta un di nan cu tambe a señala cu nos tin hopi aña papiando di reforma, pero no a wordo ehecuta. Tambe LaSorte a pidi pa saca henter e discusion aki for di sfera politico den cuadro di eleccion venidero.

Gran mayoria di esunnan presente a vocifera nan critica riba e forma con Hulanda a probecha e coyuntura di e crisis Covid pa impone riba nos. Nan a cuestiona cu Hulanda tampoco no a duna nos espacio pa negosha. Nan a bin cu un documento diki cu varios condicion pisa y den menos cu cuater dia, pais Aruba mester tuma un decision.

Otronan a haci referencia cu e condicionnan di Hulanda a pone den peliger Aruba su autonomia, cu ta un logro historico di Aruba su pueblo. Te hasta nan a cualifica como un falta di respet loke Hulanda kier haci contra Aruba. Juan Geerman di SADA a trece dilanti cu pueblo ta den condicion hopi critico, y nos mester para hunto contra Hulanda. No nos por bay “na merced di Hulanda” pa entrega autonomia cu nos pueblo a lucha duro p’e, el a laga sa.

Sindicalista Diego di Cuba di STA ta lamenta loke Hulanda ta haci cu nos, lubidando nos relacion historico. El a bay tempo di II Guera Mundial cu Aruba, un isla humilde, a bira un aliado clave di Hulanda. E tempo aya te hasta ayudo di Aruba a bay pa Hulanda sin condicion y a cambio di nada.

Otmar Tromp di KvK a bisa cu esaki no tabata e forma mas elegante di Hulanda pa bin cu condicionnan di e manera cu nan a haci’e. Pero si el a laga sa cu for di añanan Hulanda a pidi pa bin cu reforma fiscal y nan no a wordo scucha. Awor gobierno no tin choice. Sindicatonan manera SIMAR y SADA a expresa nan falta di confiansa cu gobierno, a base di experiencia cu nan a pasa aden, segun e sindicatonan aki. Te hasta nan a mustra nan desconfiansa riba informacion cu a wordo treci dilanti. Nan ta prefera di mira e documento pa emiti cualkier opinion.

No a falta algun propuesta pa reactiva nos economia manera esun di Aruba Timeshare Association (ATSA) caminda su presidente Luigi Herrera a propone pa bin cu cambio riba ley laboral y flexibilidad riba belasting pa reactiva nos economia. Mientras cu Daniel Ferrara di Aruba Food & Beverage Association a mustra su preocupacion bisando cu di e 200 negoshi chikito caminda 6 mil trahado ta traha, si nan ta perde subsidio di salario e luna aki, practicamente nos economia local lo disparce den un luna. “Aruba lo keda den man di stranheronan door di hotelnan stranhero y companianan stranhero,” el a bisa.

Nan tabata algun opinion, inkietud, preocupacion y preguntanan cu e representantenan di sindicato y gremio a trece dilanti a base di e informacion cu gobierno a comparti cu nan. Nan a gradici gobierno pa invitacion aki, pero si nan a laga sa cu e tipo di reunion aki mester por a tuma luga prome cu e situacion aki a presenta cu Hulanda. Nan a pidi pa gobierno sigui reuni cu nan.

Entre e sindicatonan presente nos por menciona entre otronan: SIWA, FTA, SADA, OPPA, ABv, SIMAR, STA, STT, SEPPA y SPA. Pa loke ta e participacion di gremio comercial y organisacion di pensionado, nos por menciona, ATIA, KvK, AHATA, SNBA, ATSA, AF&BA y OPPA.