Camara di Comercio den reunion cu Parlamento kier a amplia riba su preocupacion riba e concepto di ley di Serlimar pa loke ta competencia inhusto den mercado di recogemento di sushi. E gremio comercial ta haya cu negoshinan cu genera mas desperdicio mester paga mas cu esunnan cu ta genera menos. Ademas nan ta haya cu gobierno di Aruba mester sondea bon pa percura cu e incinerator ta e miho opcion pa nos pais.

Diahuebs 19 di september directiva di Camara di Comercio y Industria di Aruba (KvK) a tene un reunion cu miembronan di comision di Parlamento encarga cu finanzas, asuntonan economico y organisacion gubernamental (Statencommissie Financiën, Economische Zaken en Overheidsorganisatie). Den e reunion a elabora riba diferente punto cu KvK a trece dilanti encuanto e concepto di e ley di Serlimar y maneho di desperdicio. KvK a expresa na e miembronan di parlamento presente su preocupacionnan, preguntanan y sugerencianan riba e proyecto di ley aki. E reunion tabata fructifero caminda por a papia habri riba e tema y KvK ta gradici e comision pa e reunion.

Den e reunion KvK a trece varios punto dilanti y alabes a substancia esakinan cu splicacion extenso. Puntonan cu KvK a presenta ta pa haya claridad riba e rol cu Serlimar lo tin pa loke ta colecta desperdicio y si tin cierto exclusividad den recoge y procesa desperdicio. KvK a indica cu mester ta mas specifico riba cierto definicionnan den e concepto pa asina no perhudica negoshinan cu ta registra na KvK. KvK a indica cu no ta husto pa cobra e comerciante 300 Florin pa aña sin tene cuenta e cantidad di sushi cu cada negoshi ta produci relativamente na e tamaño y tipo di negoshi.

Extra gasto pa recoge sushi lo por tin consecuencia pa negoshi.
E ta bira tambe un gasto extra pa e comerciante cu ya caba ta purba sobrevivi cu e gastonan halto pa haci negoshi. KvK ta teme cu mas negoshi lo haya na forsa pa termina y ta mira cu e ta stimula e circuito di negoshinan ilegal. E tarifanan den e proposicion ta basa riba normanan di Banco Mundial pero mester tene na cuenta pa ahusta esaki segun nos situacion pa loke ta por ehempel salario netto y otro factornan cu tin impacto riba impuesto. KvK a haci algun pregunta tambe pa loke ta e tarifa y e impacto cu esaki tin riba e sector di turismo. Esaki tin cu bay den un forma husto caminda no ta perhudica e sector y crea mas gasto. KvK a brinda e sugerencia pa calcula y cobra e gastonan na frontera riba e importacion.

A base di loke Serlimar tin cu haya como ingreso ta calcula e porcentahe cu ta cobra pa importacion na frontera pa cubri gastonan di Serlimar. Di e forma aki ta genera e fondo pa Serlimar por cumpli cu su tareanan di recoge y procesa desperdicio. KvK a menciona tambe cu gobierno mester keda habri y cu un incinerator no ta e unico opcion pa procesa sushi. Mester evalua hopi bon cua ta e miho solucion y kico e ta costa Aruba.

‘De vervuiler betaalt’ y posicion privilegia den mercado.
Un punto importante pa KvK ta cu e cobransa pa recoge sushi mester keda husto den e sentido cu esun cu ta crea mas desperdicio tin cu paga mas pa cubri e gastonan. Den cuadro di esaki e minister encarga cu Serlimar, Otmar Oduber (POR) a declara na Bon Dia anteriormente cu e manera aki di cobra ta uno cu lo por bay haci, pero esaki lo mester tuma luga den un ‘di dos fase’, mirando cu esaki lo tuma tempo pa implementa. E minister a menciona cu esaki ta mas complica cu e opcion cu gobierno a cuminsa riba dje, cual ta pa cuminsa cobra tur hende, cual e minister a menciona cu ‘nos a haya husto cuminsa asina’.

KvK ta alerta tambe pa percura cu no ta cobra mas di un biaha pa recoge e mesun sushi. Pa via cu na Aruba no tin ley di competencia, KvK ta cuestiona si Serlimar lo haya un posicion di luho ya cu a base di loke ta indica den e diseño di ley e ta haci hopi dificil pa otro companianan drenta den e mercado y por competi riba e parti di procesa desperdicio.

KvK a haci uzo di e oportunidad pa comparti su pensamento y solucionnan riba otro punto importante cu ta parti di e reforma fiscal. KvK a trece dilanti e propuesta pa bin cu cambio di ley di BBO pa esaki funciona sin un structura di impuesto acumulativo (tax on tax). Ademas ta conseha pa cobra un solo tarifa fiho y menciona esaki riba e factura. Tur e gremionan comercial ta para tras esaki y ta considera esaki un bon solucion pa wordo inclui den e reforma fiscal.

KvK kier gradici e comision y tur esnan presente. Miembronan di comision a duna indicacion di ta aprecia e aporta di KvK pa cu e reforma fiscal. KvK ta spera di por sigui duna conseho y cu via e reunionnan transparente por yega na formula un bon reforma fiscal.