SADA:

Sindicato di Duana Aruba (SADA) tin un reunion pendiente cu minister presidente, Evelyn Wever-Croes (MEP) pa atende diferente asunto relaciona cu e cuerpo uniforma aki.

E reunion aki eventualmente ta tuma luga awe, caminda den nan punto di agenda lo trata entre otro e rol di duana tocante siguridad di nos fronteranan. SADA ta boga pa wak un coast suveillance di Duana mes.

Pa locual ta trata personal pa realisa e trabou aki, nunca e cuerpo aki ta conta cu e personal suficiente, asina Edward Maduro kende ta presidente di SADA a declara na Bon Dia Aruba. Den 18 aña cu e tin den duana practicamente e personal a keda mesun cos. E mesun situacion ta wordo presenta cu otro cuerponan uniforma manera polis y kustwacht, pero e ta haya cu nan no por sinta warda. “Si nos ta keda sinta warda riba personal mi ta kere nunca e trabou por wordo haci.”

Otro punto cu SADA lo trata cu e mandatario ta e convenio cu nan a bin aña pasa cu gobierno pa bin cu un restructura salarial. Na inicio di e aña aki nan a dicidi di para nan trabou pa sostene un reunion cu minister Xiomara Maduro (MEP), ya cu SADA no tabatin un clarificacion di e gobierno nobo riba e parti di e restructuracion salarial aki. Despues di algun reunion cu minister di Financia, nan a logra yega na un acuerdo unda nan ta acepta e convenio aki. Pero si ta lamentabel pa SADA cu un parti di e convenio e gobierno actual, no kier a honra di un grupo di personal cu no ta duana ambtenaar cu ta esunnan cu ta traha den e parti administrativo.

Tambe na final di februari ultimo, SADA a yega di informa e mandatario di financia cu nan miembronan a duna gobierno te final juli pa concretisa e restructuracion salarial, ya cu practicamente ta bay pasa un aña caba. SADA tin indicacion for di directie Wetgeving cu pa juni awor, nan lo finalisa e proceso legal aki. Considerando esaki, personal di duana representa pa SADA a dicidi di duna un luna mas di spera pa asina no mas tarda cu fin di juli, e asunto legal di restructuracion salarial lo ta finalisa. “Bo por considera esaki como un death line”, segun presidente di SADA.

“Nos a compronde y e coleganan a compronde y a duna e gobierno espacio pasobra tur hende sa cu tabatin eleccion aña pasa.” Nan a duna gobierno un chens pa pone tur cos na ordo, tambe recientemente nan tabatin tratamento di presupuesto 2018, y prome cu esey tabatin preparacion pa bin cu e ley aki di pais Aruba.

Personal y material
Segun presidente di SADA, nan a yega di bin cu idea innovativo pa pone personal disponibel pa haci e trabou di vigilancia di nos costa. Pero nan ta lamenta cu e director di Duana ta keda uza como excuus cu no tin personal. Mientras cu SADA ta keda kere cu unda tin boluntad, bo por logra.

Sinembargo ademas di e boluntad pa haci e trabou e mas principal ta cu nan tin coleganan cu ta dispuesto pa haci e trabou pa vigila nos costa. Nan tabatin un encuesta aña pasa cu a wordo organisa bou e trahadonan di duana unda a resalta e tipo di trabou cu nan kier haci. Den nan a resalta cu nan kier vigila y/of cuida nos costanan y comunidad di Aruba pa tur loke ta drenta ilegal, ya cu den tur parti di mundo Duana ta e prome yama pa cuida costa, pero akinan no ta wordo considera parti di nan trabou.

Pa SADA esaki ta inaceptabel y incomprendibel. Ya cu e mesun director cu a yega di realisa full un carera den cuerpo di duana, y tempo cu e tabata den e mesun posicion cu mayoria di personal di duana ta awendia, tambe a yega di realisa trabou di vigilancia di costanan. “E sa cu esaki ta parti di trabou di duana.” Sinembargo ora cu tur hende a pensa cu den su funcion como director e lo bin cu tur e trabou aki bek, lamentablemente esey no a sosode.

Encuanto necesidad di material pa realisa e trabou aki, SADA no por bisa precies cuanto material nan tin disponibel. Pero riba cierto material e sa cu nan tin suficiente. Tambe nan sa cu tin cuater vehiculo cu gobierno a cumpra aña pasa y cu a wordo modifica pa haci e trabou di core costa. Pero SADA ta kere cu si ‘e director por a actua mas diligente den esaki y nan mester prepara e cuerpo pa realisa e trabou pa vigila nos costa, no aworaki sino dos pa tres aña pasa’.