Reuni di parlamento riba finanzas y autonomia posponi pa mañan: No ta momento pa Hulanda bin cu condicion irealistico

E reunion cu presidente di Parlamento a convoca pa ayera cu minister presidente, Evelyn Wever-Croes y minister di Finanzas y Economia, Xiomara Maduro riba sosten financiero den Reino Hulandes, condicionnan di Hulanda y autonomia a keda posponi pa mañan diaranson.

Aunke e ta un reunion publico, parlamento ta sigui mantene nan tribuna temporalmente cera. Pero nos comunidad por sigui e debate aki via social media y otro medio di comunicacion.

Presidente di Parlamento, Juan ‘Ady’ Thijsen a splica na Bon Dia Aruba cu e reunion a wordo aplasa, ya cu minister Xiomara Maduro a confronta kebrante di salud ayera.

Sr. Thijsen a yega di declara na prensa cu den cuadro di transparencia, e tin cu yama e reunion aki. Un punto cu e ta haya cu mester aclaracion tin di haci cu e declaracion ultimo di Secretario di Estado, Raymond Knops, ya cu e ta considera necesario pa e mandatario Hulandes aki tene cuenta cu cierto punto.

Pa presidente di Parlamento tin dos punto cu minister Knops di Asunto di Reino a referi na dje cu e ta haya cu no ta bon. Un den cual el a bisa cu nos pais Aruba a demostra cu no por maneha su autonomia. E di dos caminda e mandatario ta bisa cu e tres pais autonomo den Reino, Aruba, Corsou y St. Maarten, no tabatin nan presupuesto regla. Presidente di Staten a lamenta e tipo di declaracion aki, y el a bisa cu no ta berdad. El a laga sa cu e no por papia pa e otro dos paisnan di Reino, pero pa loke ta trata Aruba si.

Den e caso aki el a indica cu nos presupuesto tabata cla, caminda e tabatin un surplus di 49 miyon. Despues di atende tur deficit financiero grandi, pais Aruba a presenta un presupuesto 2020 cu surplus. Loke a demostra cu Aruba tabata canando e bon caminda. “Sr. Knops sa esey,” el a bisa.

E ta haya cu nos pais tabata bayendo bon pa drecha su finanzas cu hopi esfuerso y sacrificio, pero a bin Coronavirus dal nos economia abao. E ta algo cu nos no a spera hamas y cu nos no por yuda, ya cu full mundo a dal abao tambe. Den e crisis di e Coronavirus, nan a yega di traha un presupuesto 2020 basa riba conseho di Banco Central di Aruba y Fondo Monetario Internacional (IMF).

Igualmente el a bisa cu pa atende e situacion aki ‘nos mes a entrega di nos mes’. Nan a dicidi cu tanto parlamentario y minister mester entrega, pero tambe empleado di sector publico mester a entrega pa yuda e trahadonan di sector priva. Den un crisis di e magnitud aki -segun Sr. Thijsen- tur hende mester duna. Pero e ta haya cu no ta e echo pa Hulanda bin cu ‘condicionnan irealistico’ y cu no ta na su luga. Un punto tin di haci cu e ‘tot nadere orde’.

Presidente di Parlamento a referi na e otro punto relaciona cu nos autonomia referiendo na e declaracion di Secretario di Estado di degrada nos autonomia na nivel di un provincia di Hulanda. “No bin bisa mi cu mi no por maneha mi autonomia.”

Sr. Thijsen a bisa cu for di 1986 te awor, Aruba a sa di ta un pais autonomo den Reino. Semper Aruba tin otro autonomia cu Corsou y St. Marteen. El a bisa cu ora cu Aruba a haya su autonomia, Hulanda a pone condicionnan pisa riba nos isla. Ademas niun momento Aruba no a haya niun placa for di Hulanda. “Nos a lucha pa loke nos tin,” el a bisa. Al contrario e tempo aya, Aruba den situacion dificil tambe mester hinca placa den un fondo di solidaridad pa e otro paisnan cu a keda, y nos a logra.

Presidente di Parlamento ta haya cu Secretario di Estado di Hulanda, mester compronde cu nos problema a sinta for di 2009 pa 2017. Pero e no ta kere cu nan no por bin castiga un comunidad pa foutnan cu politiconan a haci den un periodo. El a bisa cu nan ta trahando pa drecha e situacion aki.