WILLEMSTAD – Tin retraso den entrega dje edificio di Hospital Nobo na Otrobanda (HNO) For di comienso di april e edificio completo mester a ser entrega, pero ainda esaki no a sosode debi cu ainda cierto testnan no ta keda haci, ta loke cu Gilbert Martina director di HNO “Transitie en Exploitatie” N.V. a duna di conoce.
Sr. Martina a indica cu tin un retraso dor cu Ballast Nedam cu a haci construccion di e hospital, no a haci test cu mester ser haci. Ta trata aki di testnan electrico, mecanico, y hidraulico.
E test tin di ser haci pa diferente compania local bou di supervision di un compania Hulandes cu ta responsabel pa control di calidad di construccion. E compania aki ta haci e control si e resultado ta conforme specificacion di e construccion. Martina a indica cu lo tin un fecha tentativo pa entrega e edificio, pero no ta divulga esaki debi na acuerdo cu Ballast Nedam.
A base di e plan cu tabatin pa entrega di e edificio, for di luna di maart y april mes mester a cuminsa haci e simulacion pero tin retraso. Tin di haya e edificio completamente na disposicion pa por start. Pa loke ta trata inventario cu mester bay den e edificio nobo, Martina a indica cu esaki ta plania pa sosode na luna di juni y juli venidero. Lo instala tur inventario y esunnan medico tambe. Sinembargo ta enfoca pa e hospital por ta operacional pa fin di aña y ta bay haci tur cos pa esaki tuma luga.
Finalmente sr. Martina a bisa cu ainda mester basha un parti di SEHOS abou, pa pro construi e caminda cu ta bay pega na e rotonde patras di Hospital nobo. Igualmente mester kita e pomp di gasolin di Curoil cu tin na Colon actualmente.
Den luna december cu tabatin combersacion y sr. Martina a indica cu a planifica cu Ballast Nedam pa medio december por cuminsa haya algun departamento. Ta cuminsa haya e hala “Blauw”, caminda e druktank ta, e parti Lila caminda e stoelnan di dialisa cu ta hala D, ta haya parti memey cu ta e Atrium, caminda e recepcion ta. Y ta haya e departamento H3, caminda ariba tin departamento di mucha, tin cuido intensivo, tin poli abou y cushina.
Mediano februari a haya dos otro hala B y C, e parti memey caminda Camber di Operacion ta y e prome parti caminda ambulance ta drenta, y radiologia.
Dia 2 di april 2019 Ballast Nedam a indica cu lo a entrega HNO y cu tecnicamente tur cos ta funciona. Sinembargo manera nos a indica ariba ainda cierto test no a ser haci pa entrega e edificio.
