Na e momento aki ya no por cumpli cu e plasonan estableci den e Acuerdo Final di Paz, entre gobierno Colombiano y e organisacion guerrillero Farc. E acuerdo ta contempla e entrega completo di armamento di e organisacion na e Mision di Nacion Uni, dentro di 150 dia despues di firmamento di e acuerdo. E fecha aki tabata 29 di april ultimo.

E motibonan pakico no por a cumpli cu e plan ta principalmente e problemanan logistico cu a presenta den entre otro e preparacion di e campamentonan den cual lo a aloha e ex combatientenan di Farc pa realisa e entrega di arma. Ademas e tramitenan pa percura pa e indultonan di e guerrilleronan cu derecho riba esaki, a resulta mas dificil y compleho cu a pensa inicialmente. Di e presonan cu ta como 2500, solamente 200 a haya nan libertad te awor.

Tambe a subestima di ambos banda e tarea di recoge y transporta tur e armamento cu Farc tabatin warda na luganan remoto den selva di e pais. Loke tabata riba mesa pa ehecuta pa dia 29 di april, ta e entrega di e armanan individual di e combatientenan, agrupa den 26 sitio den henter e pais. Segun Farc, ta trata di 6884 arma.

E meta actualmente ta pa yega na completa e entrega individual di arma pa dia 180 despues di firma acuerdo, cu ta dia 29 di mei proximo. Den e acuerdo sin embargo, pa e fecha aki ya e integrantenan di Farc lo a bandona e sitionan di concentracion, y cu ya nan lo a pasa pa bida legal liber.

“Aunke no ta facil, nos di Farc ta haciendo tur lo posibel pa entrega tur arma individual pa dia 180 desde e dia di firma acuerdo,” segun declaracion di hefe guerrillero Pastor Alape.

Pa gobierno ta fundamental pa cumpli cu e fecha ey. “Segun loke a acorda den e reunion di Cartagena, ora nos evalua e avance di e implementacion di e acuerdonan, a base di cu pa e dia 180 desde e acuerdo, e desarme mester ta completa y ta termina cu e figura di e zonanan veredal, gobierno lo ta dispuesto di probecha e infrastructura cu nos a construi na e luganan ey pa prepara e miembronan di Farc pa naN reincorporacion y capacita tambe e comunidadnan bisiña,” e comisionado pa Paz, Sergio Jaramillo ta declara.

Tambe, despues di e bishita inespera di miembronan di Conseho di Siguridad di Nacion Uni siman pasa, cu a aproba e mision di e organismo na Colombia pa asisti den e proceso di desarme, e delegacion aki a regresa New York cu e idea cu “gobierno y Farc tin cos pa regla”, pero cu esey no mester cambia e programa di desarme, por lo menos no di e armanan individual.

Loke definitivamente no ta bay logra den e schedule di tempo acorda, ta e tarea di recoge arma y municion di 949 luga di almacena cu Farc a raporta. Un cos ta e boluntad politico di gobierno y guerrilla, y otro cos e realidad den tereno. E fecha pa conclui e proceso ey lo keda defini den e proximo dianan.

Extrae arma, municion y explosivo di mas di 900 sitio, varios di nan na simannan di cana, o solamente accesibel cu helicopter, ta un operacion logistico hopi dificil. Ademas ta surgiendo e problema cu mientras tanto otro gruponan, manera banda criminal, por yega na e depositonan aki, loke ta aumenta e urgencia di actua cu diligencia.