E referendum caminda e trahadonan di CMB a dicidi pa sindicato FTA representa nan, a haya un transcendencia grandi. Esaki mirando cu esaki lo por tin su impacto cerca e trahadonan di e mesun grupo bancario na Corsou cu no ta organisa sindicalmente ainda.

E caso di CMB tabata un excepcion ya cu den mundo bancario local, sindicato a yega representa nan trahadonan hopi aña caba. Pa añanan largo CMB no tabatin presencia di sindicato, pero e trahadonan di otro institutonan bancario, algun di nan mas cu 30 aña pasa, tabata organisa sindicalmente caba.

Unabes e resultado di e referendum ta conoci, ambos parti tin cu cuminsa e proceso di negosha e contracto colectivo (CAO). Un CAO ta un acuerdo entre e dunado di trabou y un sindicato cu ta representa e empleadonan. Den e acuerdo aki e partidonan ta haci palabracionnan tocante entre otro condicionnan di trabou, eventual aumento di salario, vakantie, duracion di trabou, overtime, etc..

Situacion laboral y afiliacion sindical
Encuanto situacion laboral y afiliacion sindical, mediador di gobierno, Anselmo Pontilius ta haya cu den e sociedad cu awendia nos ta biba aden, no mester existi e tipo di discusion aki mes. Den un estado di derecho tur hende tin e libertad di scoge e caminda democratico cu tin. Sinembargo e echo cu e trahadonan di un empresa ta drenta un sindicato no kiermen cu e trahadonan ta haci loke nan kier, ya cu tur empresa tin regla. Pero tambe e compania tin cu respeta esunnan cu a scoge pa e sindicato representa nan.

Segun sr. Pontilius e sector bancario rond mundo, manera otro sectornan ta pasando den un proceso di reorganisacion cu hasta a yega di costa cuponan di trabou, y Aruba no ta un excepcion. Cada bes e tendencia ta cu e trahadonan kier ta mas organisa. E cantidad di referendum cu a wordo celebra durante e ultimo añanan ta mustra cu un aña tin mas y otro menos. Si bo ta mira e porcentahe na mundo a base di cifranan publico pa Organismo Internacional di Trabou (OIT na Ingles ILO) ta mustra cu e crecemento sindical no a crece manera nan a spera.

Na Aruba tin un desaroyo notabel, ya cu e trahadonan a bira mas consciente. Den esaki e social media a hunga un rol ya cu tin mas grado pa acceso na informacion. Pero tambe ora cu e trahado ta sinti cu tin situacion cu por afecta su stabilidad y cierto derechonan adkiri ta core peliger, nan ta busca un proteccion pa medio di un sindicato.

“No necesariamente e sindicato t’ey pa percura pa bo haya mas adelantonan financiero directo of indirecto. Sino cu e hende ta wak’e como un forma di proteha nan cupo di trabou, entre otro.”

Man den man
Den e tempo actual cu nos ta biba, dunado di trabou y sindicato mester ta man den man cu otro a pesar di diferencianan di opinion. E motibo di esaki ta –segun mediador di gobierno- cu e retonan na nivel mundial ta grandi.

E dunado di trabou y e sindicato mester ta creativo con pa percura cu tin cuponan di trabou permanente. Esaki specialmente pa e mundo bancario, ya cu e sector aki ta depende di su cliente cu ta bin fia placa of aplica pa un hipoteca, etc.. Pues si mas trahado tin un situacion abnormal di instabilidad di entrada automaticamente banco ta laga di percibi entrada. Un persona cu ta traha pa un tempo defini so, dificilmente e por haya un prestamo pa un auto of un cas.

Na 2018, mirando e aspecto financiero dificil y e pronostico di crecemento economico limita, nan por ta factornan cu por contribui cu e trahadonan ta dicidi di bati porta di sindicato. Si e hendenan tin miedo cu ta bay perde beneficionan existente, e lo bay busca un forma pa protege loke e tin.

Conscientisacion
Sr. Pontilius a indica cu nos mester keda mira nos situacion. Aruba ta un pais chikito cu ta depende di loke ta sosode pafo den mundo. P’esey ta hopi importante cu e conscientisacion t’ey tanto di e dunado di trabou como e trahadonan pa asina establece e limite pa nan ta keda sobrevivi. Mediador di gobierno ta reitera cu ta hopi importante pa tur trahado compronde cu di cada florin cu ta drenta den caha di e empresa, cuanto di e florin ey ta bay na tur sorto di gastonan.

Mediador di gobierno su conseho ta keda cu den e tempo actual con leu e dunado di trabou ta bay den conscientisa e trahado di no gasta mas di loke e tin. “Pasobra esey kiermen cu e pidimento y exigencia pa haya mas, ta mas eterno.” E ta un spiraal peligroso cu nos por wak rond mundo. E pio di spiraal aki ta cu ora bo ta yega ariba e ta basha bin abou. Esaki ta manera loke nos a biba na aña 1985-86 severamente cu e ceramento di e refineria. Tambe e impacto di e caida di e Bolivar e tempo aya. Un isla cu e caracteristicanan cu nos tin ta keda uno vulnerabel.

Actualmente nos ta den un situacion cu apenas ta cuminsa di e refineria, ya cu nos a spera cu esaki lo wordo poni den operacion bek. Pero prome tabatin un periodo di hopi trabou, pero ya nos tin trahadonan cu a drenta pa e trabou di recuperacion di e refineria cu ta den problema na inicio di aña 2018. Esaki ta un ehempel clasico cu decision tuma pafo di nos isla ta afecta nos severamente. Pero tambe cu sindicato por bira mas fuerte.

A pesar di nos situacion actual, sr. Pontilius no ta kere cu Aruba ta bibando un situacion similar na esun di 1985-86. E echo cu refineria a cera na 2012 logicamente nos pais a perde entrada y tambe nos economia a base di e salarionan di e trahadonan y e trabou cu e contratistanan tin directo of indirecto for di e refineria. Ta sueldonan cu dificilmente nos por haya afo.

Tambe nos a yega di perde den ambos ceramento un cantidad di hende cualifica cu a bay laga nos pa busca futuro den otro pais. Pero a pesar di e situacion actual, caminda nos tin retonan y deficit grandi den nos pais, nos ta stabiel. Keto bay industria di nos turismo y tur loke tin rond di dje ta coriendo bon.

Logicamente e dificultadnan t’ey y nos turismo ta keda uno fragil. Despues di e crisis bancario na 2009, y a pesar di loke e cifranan tabata mustra pa loke ta turismo debi na e economia di e paisnan di Europa y Merca, nos ta keda haya turistanan.

A pesar cu nos a perde un fuente di turismo grandi cu ta Venezuela cu cifranan a wordo cuantifica caba di parti di ATA. E situacion di e ceramento di frontera di parti di Venezuela a haci cu di repenti nos aeropuerto a keda sin haya un cantidad di vuelonan cu tabata bin di e pais aki. Pero for di otro mercadonan nos ta bin hayando turista. Tambe Aruba y otro islanan di nos region ta probecha temporalmente di efecto riba otro islanan, manera Puerto Rico, St. Maarten, etc..

Esaki no ta kita cu nos tin retonan nos dilanti cu nos tin cu wak con nos ta bay atende cu nan. P’esey e ta haya sumamente importante pa cuantifica e efectonan di e situacion aki.