E proceso pa retira un grupo di trahado di InselAir, ta den recta final. InselAir ta obliga na retira personal. E cantidad exacto di trahado cu lo perde trabou na InselAir no ta conoci ainda. Loke si ta definitivo ta, cu e compania ta obliga na kita hende for di trabou.
Junny Sluis, director adhunto di InselAir a bisa, cu probablemente e siman aki lo bira conoci cua ta e trahadonan cu lo mester bay cas. Sluis ta cauteloso encuanto e fecha exacto, pasobra no ta tur e tramitenan di retiro ta den man dje compania di aviacion. Mester caba di haci e analisis completo, pasobra no por kita hende for di trabou pa loco, Sluis ta remarca.
E retiro dje trahadonan lo cana via di SOAW . Segun Sluis, di tur manera ta trata di un proceso lamentabel y cu InselAir lo percura pa tentamina e proceso aki tan miho posibel. “Ma pasa den e proceso aki caba cu un compania di aviacion y mi sa kico e ta nifica pa e hendenan. Mester tene cuenta cu ta trata di mama i tata di famia cu lo afecta bida di hende”. Ta posei mester hacie bon, tumando na cuenta e aspectonan humano”. Por lo pronto InselAir lo no bula pa Barquisimeto, Caracas, Georgetown, Haiti, Kingston, Las Piedras, Manaus, Medellin, Miami, Paramaribo, Port of Spain y Santo Domingo. Junny Sluis a splica, cu entrante diaranson ta para benta di ticket pa tur e otro rutanan cu no ta esunnan di Caribe Hulanda, pasobra ainda InselAir no ta dispone dje sobra avionnan pa por ehecuta e otro rutanan.
Ainda e avionnan ta na tera na Aruba y InselAir a paga otro companianan pa tek bula e rutanan, pero e ta costando demasiado cen. A pensa cu lo dura menos tempo, mientrastanto e avionnan tin 6 siman na tera. InselAir no por cubri e gastonan mas. Ta p’esey mester a tuma e medida pa stop di ehecuta e rutanan ariba menciona. Hendenan cu ta dispone di un ticket pa e rutanan cu InselAir por lo pronto no ta bula, por tuma contacto cu InselAir pa tende kico por haci pa nan y con por hacie. “E no ta un cuestion cu e vuelo a para y cu asina tur cos a caba, pero nos tin un obligacion tambe”, segun Junny Sluis. InselAir lo atende e asunto aki tambe na un manera corecto. Sluis a enfatisa cu no ta stop InselAir a stop di bula, pero cu ta suspende e vuelonan, te ora cu e avionnan ta bek y cu e situacion ta stabilisa.
