Retiro Oduber; gobernador ta pidi opinion di parlamento

Gobernador ta pidi opinion di parlamento

Otmar Oduber ta retira como minister y di partido AVP

Oduber: ‘Prome Minister a keda ignora e problemanan’

Sevinger: ‘No ta facil pa traha cu ne’

MEP ta urgi pa reunion publico riba retiro 

Otmar Oduber a entrega su retiro como minister di Turismo, Transporte y Cultura pero ta laga sa cu su carera politico ta hopi leu di termina. E tambe a retira for di partido AVP. Gobernador a manda un carta pidiendo parlamento pa duna su opinion.Segun Gobernador e ta dispuesto pa acepta e retiro di sr. Oduber a base di un combersacion cu prome minister Mike Eman. Den e carta pa parlamento e ta referi na e constitucion pa asina mas pronto posibel ricibi e opinion di parlamento riba e retiro di minister Oduber.

Prome minister Mike Eman no a reacciona oficialmente ainda. Su coleganan Paul Croes y Benny Sevinger si a reacciona den prensa.

Interesante siguramente ta e reaccion di sr. Sevinger como cu minister Oduber a bisa cu ayera den e conferencia di prensa na e cas di su mayornan cu un di e motibonan pa su retiro ta e aprobacion di Sevinger (y su colega minister Alex Schwengle) pa Holiday Inn por extende cu 600 camber y asina cambia pa un all-inclusive.

Minister Sevinger encarga cu Infrastructura ta bisa cu e motibo aki cu sr. Oduber a duna pa su retiro ta algo di hilaridad y nonsense. E decision aki segun e mandatario no a cay for di cielo como cu ya na 2015 e plan di Holiday Inn tabata entrega na DIP.

‘No ta facil pa traha cu ne’
E mandatario tambe ta expresa cu no tabata facil pa traha cu minister Oduber como cu e kier ‘impone riba caratera di tur minister’. Asina ta haci cu e ministernan tabatin gran dificultad pa traha cu ne y tampoco scucha opinonnan di su otro colega ministernan. “Opinion di otro no ta conta”, asina minister Sevinger ta bisa.

Minister Paul Croes a indica cu e ta haya cu sr. Oduber sa tuma decisionnan hopi emocional. E no ta haya cu e decision di retiro ta algo di sorpresa como cu e desaroyonan e aña aki.

Di dos biaha na gobernador
Comienso di januari minister Oduber ya a bay gobernador pa vocifera su problemanan cu e tin cu gabinete Eman. Ya caba el a menciona e problema cu e maneho di otorga permisonan pa operacion di hotel, manera Bon Dia Aruba a skirbi e tempo. Nunca a sali afo cua hotelnan minister Oduber tabata referi na dje, pero ayera esaki a bira hopi cla. Un otro punto di discusion fuerte den Conseho di Minister tabata e criminalidad y  minister Oduber tabata haya cu su colega minister di Husticia no tabata haci suficiente pa combati e problema di atraconan y otro atakenan riba nos siguridad. Tambe e finansa publico tabata un punto importante pa sr. Oduber pa asina pone presion riba gabinete Eman pa drecha. Finalmente na maart a resulta cu minister Oduber a sinti cu el a haya suficiente oido di su coleganan y a dicidi di no entrega su retiro.

Sinembargo e siman aki e storia aki a cambia atrobe.

Evaluacion pa un partido nobo
Ayera merdia sr. Oduber ta comenta: ”Mi a bisa minister president Eman cu mi carera politico no a caba ayera ni awe. Un lider no ta wordo traha. U lider ta nace y ta gana e confiansa di ta lider. Un partido ta mescos. Un partido ta nace for di e curason di un pueblo cu ta sinti cu mester un partido nobo y den e dianan mi dilanti mi lo evalua kico e espacio pa esaki ta. Otmar no ta cansa ainda, nos tin hopi mas pa bay.”

Despues di a entrega su carta di retiro na gobernador diahuebs 2or di merdia, sr. Oduber a bay na cas di su mayornan na Ponton unda cu hopi di su apoyadonan, coordinadornan, amigonan y miembronan di famia tabata presente.  Aunke ningun hende presente cu nos a acerca kier a comparti cu Bon Dia Aruba un reaccion riba e decision di sr. Oduber, a tuma nota cu tabata tin hopi aplauso di su hendenan cu ta sostene e decision aki. Pa ley, e posibilidad pa sr. Oduber haya un funcion den parlamento despues di su retiro como minister, ta unicamente si un hende mester bandona su stoel di parlamento. ”Pa mi esey no ta importante. Locual ta importante pa mi ta sea ta paden of pafo di parlamento, e 4.000 plus di mi votadonan lo definitivamente wordo representa.”

Motibonan di retiro
”For di mi 17 aña mi a sostene partido AVP, tabata bin Aruba, encadena mi curpa dilanti Bestuurskantoor den manifestacionnan na 93 y mi a sigui sostene te caminda mi ta awe. Pero a yega un punto cu mi ta bisa cu mi no ta reconoce mas e principio, moral y balornan cu e gobierno aki ta basa su mes riba nan”

Tin varios motibo segun sr. Oduber na pakico mester a yega asina leu na e decision di retira como minister. Asina e ta ripiti motibonan cu el a duna na januari tambe. Entre otro,  e tema di criminalidad definitivamente ta un preocupacion como mandatario di cual segun sr. Oduber, por perhudica tur cos cu nan a traha asina duro pa logra. ” Ora bo tin un minister caprichoso cu ora bo kier saca un man pa yuda, ta wak mas si bo ta saca un potret door di yud’e of cu si bo ta gana un punto riba dje anto mi ta kere ya caba esey ta un actitud robes.” Segun sr. Oduber e druppel cu a pone cu el a dicidi pa tuma su retiro per direct e siman aki tabata pa motibo cu sinembargo e proceso a wordo firma pa  Holiday Inn Hotel bira all inclusive.

Prome minister ta ‘ignora’ problemanan
Ministernan no tabata yega na otro pa basta tempo caba en cuanto ta diferente decisionnan relaciona cu criminalidad y turismo. Segun sr. Oduber, tabata tin un serie di combersacion cu tur hende cu prome minister te hasta cu sr. Henny Eman anto riba tur nivel. Sinembargo,despues di tanto discusion, ningun hende por a remedia e situacion.

Sr. Oduber a cuminsa enfrenta un situacion fastioso como minister desde 2013 di cual e ta bisa a bira hopi mas serio aña pasa pasobra prome minister a keda ignora e problemanan. ”Mi a alerta, mi a papia, mi no ta un persona cu tin cabey riba mi lenga. Ora cu no tabata tin oido, mi a bishita gobernador na januari. Ainda tabata tin un speransa cu aparentemente a haya oido pasobra 9 minister a firma un documento cu nos ta bay traha riba nan.”

Sr.Oduber a duna indicacion cu e no tabata sintiendo comodo y orguyoso ultimamente di ta formando parti di gobierno, comparando esaki cu e mundo di negoshi.  El a menciona algo cu su wela tabata bisa cu: ”si bo no caba cu e negoshi, e negoshi ta caba cu bo.”  Sr. Oduber ta bisa cu den politica e ta mescos. Si abo no caba cu e organisacion, e organisacion ta zorg pa e caba cu bo.

MEP:
Den un carta pa presidente di parlamento, lider di fraccion di MEP a urgi pa un debate urgente relaciona cu e retiro di minister Otmar Oduber, pero mas aun pa e motibonan cu e minister a menciona pa cu su retiro.
“Cu e retiro di Otmar Oduber, nos ta dilanti un scenario politico nobo. Partido AVP ta kibra! Sinembargo, pa locual mi a scucha di e conferencia di prensa di Otmar Oduber, no ta e so mester a baha, ta henter e gabinete mester a baha! 
Otmar Oduber a hasi cierto declaracionnan cu a obliga nos pa urgi pa un debate publico. El a declara entre otro cu AVP a drenta gobierno pa hasi y deshasi. El a referi tambe na e hecho cu e 9 ministernan a firma un documento na januari cu nan no a cumpli cune. Sinembargo, nunca Parlamento a mira e documento ey, siendo cu nos a pidi p’e na numeroso ocasion. Aparentemente e documento ta importante, dicon e ta keda scondi pa Parlamento?
Otmar Oduber a lansa un acusacion grave, cu un minister (Sevinger) a duna permiso pa 600 kamber pa un hotel all-inclusive; minister Sevinger a reacciona mesora bisando cu no ta berdad. Un hende ta ganja akinan, y Parlamento mester sa. Pasobra poco tempo pasa den Parlamento tabata tin un discusion fuerte pa cu e tema aki.
Otmar Oduber a califica minister Dowers como un minister caprichoso cu tin miedo ken ta piki punto riba dje, y ta mas interesa den un potret cu den solucionnan pa e problema serio di criminalidad den nos pais. Otmar Oduber a expresa su preocupacion con criminalidad ta cabando cu nos pais, exactamente e preocupacionnan cu nos tambe tin. 
Finalmente na minister Eman el a expresa e falta di liderasgo di Eman, cu lo a faya pasobra no tabata interesa den un solucion. Y nos fraccion ta totalmente di acuerdo cu Otmar Oduber den esaki.
Un otro remarque cu a capta mi atencion tabata ora Otmar Oduber a menciona cu e no ta reconose e principionan mas di su partido, e mesun palabranan cu Juan David Yrausquin a menciona despues di su retiro, y cu sra. Desiree Croes tambe a menciona dia cu el’a hera sali di partido.
Despues di scucha tur esaki nos conclusion ta cu no ta Otmar Oduber so mester a retira, sino henter e gabinete, cu ta hasi y deshaci, y a lubida nan compromisonan y nan principionan. 
Pa e motibo aki nos a pidi un reunion publico urgente cu ministernan Eman y Dowers, pa nos haya aclaracion. Nos ta spera cu e presidente di parlamento yama e reunion aki pronto”, asina lider di MEP Evelyn Wever-Croes a duna di conoce.

Fraccion di AVP te ainda no a reacciona riba e retiro di sr. Oduber.