Diabierna mainta durante un rueda di prensa di gobierno, Prime Minister, Evelyn Wever-Croes, a anuncia cu a Aruba a keda na di dos luga den e region Caribe den e evaluacion di e instituto internacional Caribense CFATF cu a evalua Aruba su sistema di combatimento di labamento di placa y financiamento di terorismo (AML/CFT, Anti-Money Laundering and Counter-Terrorist Financing).

Durante e conferencia Sr. Gino Giel, Policy Legal Advisor na Directie Wetgeving en Juridische Zaken (DWJZ) y miembro di e secreteriado di e stuurgroep di labamento di placa y financiamento di terorismo (AML/CFT) a duna tambe un presentacion cu un resumen cortico di e resultadonan di e rapport di e evaluacion di AML/CFT di Aruba. El a elabora ariba algun punto di e resultado di e evaluacion y algun accionnan di prioridad cu e rapport a recomenda.

Pa loke ta trata resultadonan clave den e rapport nan ta meciona e comprendemento di e risiconan di labamento di placa y financiamento di terorismo cu Aruba ta enfrenta, e strategia cu Aruba mester tuma pa cu e tema di ML/TF bayendo pa dilanti, e cooperacion internacional, supervision di Banco Central di Aruba, como tambe e aplicacion di medidanan preventivo door di insitutonan financiero y empresanan y profesionnan no financiero y e sistema pa identifica personanan natural cu ta beneficiario na final di entidadnan legal.

Giel a elabora tambe ariba FIU (Financial Intelligence Unit) Aruba su uso di informacion financiero di Aruba, e parti di investigacion y siguimento di casonan di labamento di placa y financiamento di terorismo y por ultimo e parti di confiscacion di e actonan criminal.

E prome punto ta e comprendemento di e risiconan. Giel ta splica cu Aruba a completa su national risk assessment (evaluacion di riesgo nacional) na 2020 cual tabata un proceso di dos aña y a envolve participacion di sector publico y priva. Segun e rapport e descubrimento di e evaluacion nacional di riesgo tabata rasonabel y comprensivo.

Tambe ta wordo reconoci den e rapport pa autoridadnan competente cu den e sector priva tin un bon comprendemento di e risico cu nan ta enfrenta y ta aplica medidanan pa mitiga nan risico di labamento di placa y financiamento di terorismo.

Pa loke ta e strategia Aruba actualmente tin un draft di un documento nacional di strategia cu ta den su fase final pa aprobacion. Giel ta indica cu e documento aki ta contene un plan di accion intensivo pa adresa diferente vulnerabilidadnan den Aruba su sistema di combatimento di labamento di placa y financiamento di terorismo.

Tambe e rapport ta reconoce cu autoridadnan competente tin nan mesun norma- y proceduranan na luga pa adresa y mitiga nan mesun risiconan.

Otro punto cu ta wordo menciona den e rapport ta e cooperacion internacional. E rapport ta reconoce cu autoridadnan competente ta provee cooperacion internacional incluyendo asistencia legal mutuo y extradicion den un manera oportuno.

Asistencia legal mutuo ta un forma di cooperacion entre diferente pais cu e proposito di colecta y intercambia informacion den casonan penal cu por tin un aspecto internacional.

Pa loke ta e parti di supervision, Giel ta menciona cu Aruba a score hopi bon den esaki. El a sigui splica cu Banco Central di Aruba ta actualmente e unico supervisor di AML/CFT na Aruba pa institutonan financiero y tambe pa empresa- y profesionnan no financiero. Bao di emprese- of profesionnan no financiero ta cay entre otro abogado, notario, car dealers, casino etc.

E rapport ta reconoce cu Banco Central tin un bon comprendemento di su funcion como supervisor y ta implementa un enfoke basa ariba riesgo robusto pa cu su supervision riba e diferente sectornan.

Den e parti di medidanan preventivo, aki tambe Aruba a score hopi bon. E rapport a constata cu un sistema di medidanan preventivo, incluyendo e rekesitonan pa normanan interno y control ta na luga pa institutonan financiero y tambe pa empresa- y profesionnan no financiero. Esaki ta a base di e ley LWTF (Landsverordening voorkoming en bestrijding witwassen en terrorismefinanciering).

 

E tema di BO (beneficial ownership) information tambe a wordo trata den e rapport. Giel ta subraya cu a pesar cu na momento di e evaluacion Aruba no tabata conta cu un structura legal pa e registracion di beneficial ownership, e rapport ta reconoce cu informacion di beneficiarionan final di entidadnan legal tabata y ta disponibel door di implementacion di LWTF.

LWTF ta rekeri instituonan financiero y empresa- y profesionnan no financiero pa identifica UBO’s (ultimate beneficial owner) y verifica nan identidad den cuadro di diligencia debi di e cliente.

Giel a remarca cu entre tanto e cambio den e ley a wordo aproba y aworaki por bay over na implementa un sistema di registracion di UBO’s na Camara di Comercio (KVK) cual tur autoridad competente lo por tin acceso na e informacion ey.

FIU (Financial Intelligence Unit) Aruba a haya un bon rating pa loke ta trata e efectivdiad y tambe a wordo constata cu e informacion cu FIU Aruba ta maneha, incluyendo analisis, ta di calidad halto cu ta yuda otro autoridadnan competente den nan trabou di combati crimen

E rapport ta reconoce cu autoridadnan competente tin acceso na y ta usa informacion di FIU Aruba den un forma extensivo pa particularmente investigacionnan penal, confiscacion y tambe cooperacion internacional.

Pa loke ta trata investigacion di Ministerio Publico, e rapport ta confirma cu Ministerio Publico ta investiga y ta sigui varios tipo di actividadnan relaciona cu labamento di placa, incluyendo casonan compleho di labamento di placa, por ehempel esunnan relaciona na corupcion.

Giel a indica cu e tema di confiscacion aki na Aruba a score hopi bon tambe. E rapport ta reconoce cu autoridadnan competente a y ta confisca ariba un escala amplio di activonan procedente di actonan criminal manera oro, cash, real estate y vehiculonan di motor.

Pa cu esaki nan ta reconoce e compromiso pa confiscasion di parti di oficialnan di ley, FIU Aruba, Ministerio Publico y tambe e afpak team cu ta cay bao direccion di Ministerio Publcio.

Por ultimo, Giel a splica cu e rapport ta menciona tambe algun puntonan di accion di prioridad pa Aruba di cual el a elabora ariba cinco. Primeramente e rapport ta duna como prioridad pa implementa e documento nacional di strategia y pa sigura e alocaicon di recursonan pa combati labamento di placa y financiamento di terorismo.

E rapport ta duna tambe como punto di accion e implementacion di un permiso of sistema di registracion robusto pa cierto sectornan no financiero manera casino y sector di real estate.

Di tres punto di accion di prioridad cu Giel a menciona ta cu e rapport tambe ta pa provee training pa e oficialnan di leyt, manera KPA, Landsrecherce, RSD y fiscalnan, y Ministerio Publico y otro autoridadnan competente.

Tambe Aruba mester evalua risiconan labamento di placa, financiamento di terorismo asocia cu tur tipo di entidadnan legal y tuma medidanan pa mitiga e risiconan aki.

Por ultimo Aruba mester evalua e risico di labamento di placa y financiamento di terorismo relaciona na proveedornan di servicionan activo virtual y tambe adresa e deficiencianan den ley pa loke ta trata sancionnan pa combati proliferacion di armanan di destruccion masivo.