Diabierna ultimo a wordo celebra un referendum den oficina di Mediador di Gobierno, unda un grupo di trahado di De Palm Tours a participa den dje.
Mediador di Gobierno, Anselmo Pontilius a referi na e resultado oficial di e referendum di e trahadonan di De Palm Car Rental. Nan ta encarga di ricibi turistanan na aeropuerto, huur auto, tours di bus, etc… Un total di 58 trahadonan tabatin derecho di voto den e referendum aki. Pero 40 di nan a participa den e referendum aki pidi pa sindicato FTA.
Segun ley di referendum di e cantidad aki FTA tabatin mester di por lo menos 30 persona cu lo por a vota. Na final di e conteo di voto, FTA a haya 39, mientras un voto a resulta invalido. “FTA a haya e mayoria absoluto,” asina Pontilius a declara.
Recomendacion
Mediador di Gobierno a recomenda ambos partido, tanto dunado di trabao como sindicato FTA, pa no tarda pa sinta hunto na mesa y atende nan asuntonan.
E ta haya cu den e realidad actual di e crisis di Covid-19, e trahadonan mester por haya un splicacion riba kico ta e realidad di e compania. Entre otro con e crisis di e pandemia a afecta y ta sigui afecta e trahadonan. De Palm Tours ta un compania di hopi trahado, caminda nan ta hayando 60% di nan salario.
P’esey -segun Mediador di Gobierno- ta hopi importante pa tin claridad y no crea expectativa na corto plaso. Pero fundamentalmente tene hopi comunicacion. Pasobra e trahadonan ta biba den un incertidumbre laboral grandi, aparte di e impacto financiero pa su bida diario.
Den e caso aki Pontilius ta kere cu ta importante pa ambos partido por yega na acuerdo aworaki pa termino cortico. E speransa ta cu pa aña 2022 e situacion di nos pais por ta miho.
