Den un comunicado di prensa, Minister di Finanzas, Xiomara Ruiz-Maduro a informa cu durante ultimo dos siman, expertonan di Fondo Monetario Internacional (IMF) a haci un investigacion riba e gastonan di personal di Gobierno di Pais Aruba. Gastonan di personal y gastonan di interes ta e dos gastonan mas grandi riba Presupuesto di Pais Aruba.
Segun gobierno, e motibo di e investigacion aki ta cu Gobierno mester tin un bon bista riba e gastonan di personal, pa na momento cu tin cu tuma cierto decisionnan pa cu Pais Aruba. E gastonan di personal no por sigui crece y mester contempla pa baha e gastonan aki pa Pais Aruba por yega na un finanzas publico manehabel y sostenibel.
Den e investigacion, IMF a haci un comparacion di e gastonan personal di sector publico cu sector priva y tambe a haci un comparacion cu paisnan mes grandi cu Pais Aruba.
E resultadonan ta indica cu locual Gobierno ta paga na salario den sector publico ta substancialmente mas halto cu locual ta wordo paga den sector priva. E gastonan di personal di Gobierno ta encera e empleado publico y tambe esunnan ‘gelijkgestelden’ cu Gobierno ta subsidia nan salario. Si compara e dos gruponan aki, esunnan cu ta traha den Gobierno ta gana 40% mas cu esunnan den sector priva y e ‘gelijkgestelden’ ta gana 20% mas cu esunnan den sector priva.
Den e componente di edad, den e aparato publico e edad promedio ta aumenta. Esaki ta indica tambe cu na cierto momento tin un cantidad grandi di empleado publico cu lo bay cu pensioen. Esaki lo trece su reto cune, ya cu a subi e edad di pensioen.
Si compara e gastonan di personal den e aparato publico na Aruba cu otro Paisnan den Caribe, Latino America y sobra Paisnan, e salario di e trahado publico ta mas halto. En comparacion cu otro Paisnan, Gobierno di Aruba tin tambe mas persona ta traha pa Pais Aruba.
Gasto di ‘overtime’ tambe ta un di e gastonan cu ta subi e gastonan di personal. E componente di overtime den gastonan di personal ta 5%. Pa yega na esaki, e expertonan di IMF a uza e cifranan di aña 2018. E presupuesto den e Departamento di Husticia ta esun cu tin mas ‘overtime’, 17% di e presupuesto aki ta bay pa paga ‘overtime’. Akinan lo mester haci un investigacion mas profundo pa analisa e motibo di ‘overtime’.
