Tribunal Supremo Electoral di honduras a anuncia cu no lo tin otro boletin provisional cu resultado parcial, pero ta warda te ora tur voto ta conta pa duna e resultado final. E ultimo boletin a duna cu 58,39% di e urnanan conta, un bentaha di casi 5 punto di porciento pa e candidato di oposicion, Salvador Nasralla, riba e actual presidente Juan orlando Hernández: 45,5% contra 40,28%. Ayera diamars ainda tabata falta 41,6% di e 18.103 urnanan pa drenta.
Pa loke ta e conteo pa departamento, na e momento aki Partido Nacional, actualmente den gobierno, a logra mas voto den 9 di 18 departamento, mientras Alianza di Oposicion di Nasralla tabata ganando den e otro nuebe departamentonan.
Honduras, contrario na mayoria pais riba continente Latinoamericano, no conoce un sistema di un segundo vuelta entre e dos candidatonan cu mas voto, si ningun candidato haya e mayoria absoluto den e prome vuelta. Esey ta implica cu e resultado di e actual vuelta electoral lo ta decisivo, aunke ningun candidato a logra yega na mas di 50% di e votonan. Esun cu miho posicion actualmente ta e candidato opositor Salvador Nasralla, cu desde e prome momento a bay dilanti cu entre 4 pa 5 punto di porciento riba e actual presidente Hernández, ken ta en busca di su re-eleccion.
Mientras tanto, e candidato pa Partido Liberal, Luis Zelaya, cu a keda na tercer lugar, a reconoce cu Salvador Nasralla lo ta e proximo presidente, mirando cu casi 60% di e votonan ta conoci caba.
