E concepto di plan pa bay haci revision di sector di enseñansa ta cla. E concepto a keda traha den conhunto cu e tijdelijke werkorganisatie, TWO cu ta adelanta trabou pa e Organo Caribense di Reforma y Desaroyo, COHO cu ainda mester keda formalisa.

A traha riba e plan di accion pa enseñansa de acuerdo cu e palabracion di landspakket, y pa cumpli cu e fechanan determina mester haci un cantidad di trabou preparativo ainda, cu tin di haber cu presupuesta e gastonan necesario pa un diseño di investigacion definitivo, cu un programa mara na dje. E elementonan aki mester ta inclui den e plan di accion definitivo.

E documento tambe ta enfoca riba e risiconan conoci pa creacion di e plan y e proceso pa yega na un decision, como tambe e risiconan pa e ehecucion real di e revision di Enseñansa.

Contexto

COHO mester yuda Aruba realisa reformanan palabra cu Hulanda, cu tin como obhetivo pa fortifica economia di Aruba, door di entre otro permiti enseñansa riba un vehiculo pa un economia mas resiliente. E TWO, hunto cu e departamentonan di enseñansa di Hulanda y Aruba mester duna contenido na e medida y plannan di reforma. E ehecucion ta sosode segun e agenda di ehecucion cu Hulanda y Aruba ta palabra segun cu cumpli cu e obhetivonan. Ministerio di Enseñansa, Ciencia y Desaroyo Sostenibel ta sostene e obhetivonan di e posicion y recomendacion manera ta den e landspakket. Es mas, ta for di 2019 a busca posibilidad pa hunto cu Inspeccion di Enseñansa di Hulanda pa revisa e sistema di enseñansa di Aruba. Pero limitacionnan presupuestario a stroba e revision aki. Y awor e ta den landspakket di Aruba.

Pone calidad di enseñansa riba papel

Medidanan den e landspakket Aruba ta trata e tema di enseñansa y tin e siguiente obhetivonan, cu ta realisa un calidad basico di enseñansa, realisa un bon conexion entre enseñansa y mercado laboral y realisa un bon fluho entre e structuranan di enseñansa, na Hulanda, Aruba y otro pais (di nivel secundario pa estudio superior por ehempel).

E prome instrumento pa pone e base ta un revision di henter e sistema educativo, incluso enseñansa publico como di directivanan di scol special. Basa riba e resultado di e revision lo desaroya medidanan y implementa esakinan. E sistema educativo ta encera e totalidad di organisacionnan cu nan areglonan y medidanan, incluso e sistema educativo institucional.

Meta di e proyecto di revision

E meta principal di e proyecto di revision ta pa haya bista den e eficacia y eficiencia di e instrumentonan cu ta uza y e inversionnan den enseñansa na Aruba. De acuerdo cu e palabracionnan den e landspakket lo formula preguntanan riba e calidad di enseñansa, metodonan y medionan di les; e floho entre enseñansa y mercado laboral; fluho entre e diferente sistemanan for di scol preparatorio te na educacion superior; eficacia y efectividad di e pago di enseñansa, mitiga ineficiencianan; fortificacion di e mehoracion di calidad pa medio di un supervision mas efectivo di e inspeccionnan, entre otro; colaboracion entre institutonan di enseñansa den region y eventualmente cu Hulanda. Ademas Aruba a mustra cu mester tene cuenta cu ta ehecutando e modelo di enseñansa Hulandes den un ambiente multilingual.

Obhetivo

E prioridad di Ministerio di Enseñansa ta pa investiga e nivel di sistema. Y esaki ta encera cu ta analisa e aspectonan di maneho y direccion di aspectonan di enseñansa na nivel macro, esta e responsabilidad di e Ministerio mes. Ora ta papia di e nivel macro, ta referi riba e maneho di finanzas, ehecucion y implementacion, y su contribucion na rendimento di enseñansa y e resultadonan social desea.

E plan ta pa yega na un diseño di investigacion cu ta realisabel y factibel, unda ta tene cuenta cu posibilidadnan presupuestario, e datonan critico palabra y capacidad necesario. Ta propone pa cuminza cu un investigacion di documentacionnan, basa riba un revision di resultadonan di investigacionnan anterior, documentonan di maneho existente y otro reportahe di rendimento. Den otro palabra, lo saca tur rapport existente for di lachi.

Plan Enseñansa 2030

Na momento di formula recomendacion, lo tene cuenta con nan pasa e prueba di tempo. Ta propone pa sali di e balornan nucleo di e Plan di Enseñansa 2030. Esakinan ta enseñansa personalisa y flexibel den un ambiente multilingual y digital. Nan tin como obhetivo pa percura cu enseñansa di Aruba ta duna e alumno e habilidadnan necesario pa Siglo 21 y cu e structura ta refleha esaki tambe. Pa loke ta e leynan di enseñansa por pensa riba instrumentonan cu ta amplia e flexibilidad di legislacion pa asina por ta prepara pa futuro.

Ministerio di Enseñansa kier pa e investigacion sosode na un forma independiente y externo, aunke cu manera e landspakket ta indica, inspeccion di ambos Hulanda y Aruba lo ta envolvi. Ministerio di Enseñansa ta habri pa colabora cu partnernan di Hulanda y di Aruba cu ta cay den e area di organisacion independiente. Por pensa aki riba Contraloria General of otro servicio special di auditoria. Ta pone hopi balor na un investigado externo, particularmente pa e investigacion riba nivel di sistema, specialmente e ehecucion di e tareanan di Ministerio di Enseñansa.

Relacion cu otro proyecto

Mester tin atencion special pa e maneho financiero di enseñansa denter di e Ministerio encarga. E proyecto revision di enseñansa como tal tin areanan comun cu e proposicion di e landspakket pa bin cu medidanan generico riba maneho financiero di Aruba, generalmente ora ta trata costo y efectividad di sector publico, y particularmente, su contexto den sector di enseñansa.

E Revision di Enseñansa mester ta sigura di un base administrativo legal y e instancia cu ta bay haci e trabou mester defini e resultadonan den acuerdo cu su instruccion, laga determina y percura cu ta realisa e forma con ta bay ehecuta e investigacion. Banda di esaki, mester tin reportahe regular, unda ta ilustra e progreso y puntonan di conflicto durante ehecucion di e proyecto. E personanan cu ta bay haci e revision mester compromete na resultadonan acorda, segun e forma palabra. Y nan tin acceso na tur informacion relevante, na tur actor y otro cu tin di haber cu enseñansa. Ta tene cuenta si cu e rekisitonan di privacidad y e reglanan publico di secresia.

Resultado na October

E structura di intercambio lo keda determina despues cu forma e team di investigacion. Locual si ta importante cu ta sali di e principionan di un acuerdo efectivo basa riba agenda, producto y obhetivonan determina. E apelacion cu e proyecto lo mester haci riba organisacionnan por bay contra e procesonan di maneho y ehecucion regular, y den un caso asina, e lider di proyecto lo por conta cu sosten den e proceso di decision, y mitigacion di e risiconan. Y na di dos instancia, si e proyecto, a pesar di e sosten di e Minister encarga no ta cana, sea e TWO of COHO y e persona apunta como contrapartido, den e caso aki, drs. Indra Zaandam, lo por habri e combersacionnan of puntra pa e informacion necesario.

Minister di Enseñansa Rudy Lampe a informa Bon Dia Aruba cu e resultadonan di e revision di enseñansa lo mester keda cla na October 2021.