Segun reportahe di media internacional (People.com) e restonan humano cu a wordo haya na Aruba sospecha di ta di Natalee Holloway, no ta pertenece na e hoben Mericano. Esaki ta e ultimo desaroyonan cu a bini dilanti e siman aki relaciona cu e caso di e hoben Mericano aki perdi pa mas cu dies aña na Aruba.
Jason Kolowski, un cientifico forensico cu ta lidera e testing y interpretacion di resultadonan, a bisa Oxygen.com dialuna cu e testnan riba e fragmentonan descubri a resulta negativo. E fragmentonan aki no ta pertenece na Natalee Holloway kende su curpa ainda no a wordo haya.
E network a sigui cu e tata di Holloway, Dave Holloway buscando mas contesta den un serie di television di seis parti titula ‘The Disappearance of Natalee Holloway’. No solamente e fragmentonan no ta pertenece na e hoben, pero di tur fragmento descubri solamente uno so tabata humano segun sr. Kolowski a informa. E identidad di e persona tambe ta desconoci segun Kolowski, como tambe e sexo di e persona. “Nos no sa tampoco e edad di e persona,” el a continua. “Nos no sa tampoco con largo e persona aki ta morto.” Anteriormente, e experto forensico a bisa Oxygen cu e restonan humano tabata pertenece na un “persona color blanco, probablemente Europeo.”
E declaracionnan aki a bay den conflicto cu Ministerio Publico na Aruba kende a bisa cu na ningun momento a logra haya restonan humano na e luga unda investigado priva di famia Holloway a dirigi su mes. Natalee a disparce den 2005 anto a wordo mira ultimo cu Joran van der Sloot. Investigado priva di famia Holloway a bisa cu el a yega na un homber cu aparentemente a wordo paga 1500 dollar pa coba e restonan humano di Natalee den 2010. Tambe pa kima e restonan humano aki hunto cu wesonan di cacho. Alto comisario di Cuerpo Policial Aruba Dolfi Richardson a declara den e serie cu locual ta wordo bisa akinan ta imposibel. Y despues e ta cambia su storia y bisa: “No, no, ami no tabata presente. Tabata tin asina hopi buraco cu nos por mira den su storia cu nos tabata sa cu e realmente no tabata un testigo creibel.”
Bon Dia Aruba a purba tuma contacto cu Ministerio Publico pa un reaccion. Vocero Ann Angela a bisa nos cu nan punto di bista semper a keda mes cos. “Manera poni tambe den e relato di prensa cu nos a saca tocante e cuestion aki: e wesonan no ta humano.”
