Den un carta fecha 04 di mei 2020 director di departamento di Enseñansa a duna ministro encarga cu Enseñansa conseho encuanto ki tempo y con pa habri scol, segun e condicionnan di e actual crisis di coronavirus lo permiti esaki.

Pa loke ta e periodo di awor te cu vakantie grandi ta conseha pa habri kleuterschool y scol basico so pa dos dia den siman (40%) mientras cu no ta conseha pa habri e scolnan di otro tipo. Ademas mayornan por opta pa no manda nan yiu scol durante e periodo aki, te cu 10 di juli cu vakantie ta cuminsa, segun e conseho.

Pa aña escolar nobo ta conseha:
– Kleuteronderwiis: 40% (2 dia) na scol y 60 % for di distancia (online).

– Scol basico: desde augustus 2020 pa 40% na scol (2 dia) y 60% for di distancia (online);

– Enseñansa avansa (Ciclo Basico): 40% na scol y 60% for di distancia (online)

– Enseñansa avansa (Ciclo Avansa): 20% na scol y 80% for di distancia (online)

– EPB: 40% na scol (2 dia) y 60% for di distancia, teniendo cuenta cu vaknan di practica;

– Educacion Profesional Medio (EPI): 100% for di distancia;

– Educacion Superior: 100% for di distancia, desde inicio.

Re-educacion obligatorio di docente

E departamento ta duna su opinion encuanto e necesidadnan cerca docente y management pa maneha e situacion nobo, unda gran parti di enseñansa lo tuma lugar for di cas. E departamento ta bisa cu mayoria di e “actornan den tereno di enseñansa tin e preferencia pa laga scolnan cera y haya espacio pa sigui desaroya nan mes y prepara pa e manera nobo den cual lo mester bay duna enseñansa den e aña escolar nobo.” Y tambe cu “enseñansa digital principalmente for di e situacion na cas lo bay ofrece e solucion pa e ‘normal’ nobo riba tereno di enseñansa”.

Pa por haci esaki ta necesario pa ‘empower’ docente y management di scol a traves di curso cu ta orienta riba siña habilidadnan nobo y un modelo di traha nobo. Mester pone e cursonan obligatorio, cu por sirbi ademas como un ‘nulmeting’ pa por sigui innova e sistema educacional. Ta menciona e siguiente tipo di curso: habilidad di ICT; habilidad encuanto informacion; conocimento di medio di comunicacion y ‘e-learning’ specifico pa cada tipo di enseñansa. Pa e docentenan y miembronan di management cera conoci cu e forma nobo di siña mester tin esakinan disponible online y pa tur tipo di scol. Pa tur docente esaki ta implica cu nan lo mester sigui e cursonan ey promer cu e aña escolar nobo cuminsa.

Ta propone anto pa usa e cuatro lunanan te cu aña escolar nobo pa prepara docentenan den e habilidadnan menciona, pa haci posible cu enseñansa ta pasa pa e proximo nivel di enseñansa mayoritariamente online durante e proximo aña escolar.

Mientras tanto, ministro encarga cu enseñansa a duna permiso pa scolnan basico y di kleuter habri desde awe (18 di mei), pero no tin obligacion pa esey y no tin obligacion tampoco pa manda mucha scol.

Nota di redaccion:
E normanan cu distanciamento social ta bay impone riba un klas,cu seguridad pa alumno y docente, ta haci necesario limita e cantidad di alumno cu por ta den un klas na mesun momento. Esey ta un desafio grandi den cual no tin solucion facil. Sin embargo, opta pa habri scol te den aña escolar nobo, cu un periodo di total di inactividad di mas di 5 luna, por ta causa un daño cu no ta bay repara mas, sigur no si otro aña parti grandi di enseñansa ta bira responsabilidad di mayor y alumno. Fuera di esey, tin duda grandi si e recursonan ta disponible pa organisa un re-educacion masal di e cuerpo di docente den tur categoria di enseñansa, y si ta existi tambe e capacidad pa organisa esaki den e proximo lunanan. Si e propio promer ministro ta yega publicamente na e conclusion cu 60% di e alumnonan no a haya apoyo digital den e lunanan nos tras, kico anto ta bay ta e efectividad di no duna les te fin di augustus, extendiendo e periodo di ta cana perdi pa mayoria di mucha te na mas di5 luna. E medida anuncia awor pa scolnan basico y di kleuter habri segun nan propio criterio, por añadi mas ainda na e caos cu enseñansa ta parce actualmente caba.