Pa yega na e fin di Fondo Desaroyo Aruba, Hulanda conhuntamente cu Aruba a dicidi di inverti e resto di e suma pa reforsa e sistema hudicial, restaura edificio di gobierno bestuurskantoor y 1 miyon lo bay na reforsa e crisis plan social.
Asina prome minister Evelyn Wever-Croes (MEP) hunto cu secretario di estado di relacionnan di Reino Raymond Knops a anuncia e noticia aki durante sr. Knops su bishita na Aruba, siguiendo un bishita na henter Caribe Hulandes.
E fondo aki ta bin na su fin despues cu a inverti 500 miyon florin riba diferente sector, entre otro calidad di gobernacion, reforsa sistema hudicial y enseñansa. Prome minister a mustra alabes cu a renoba y construi diferente edificionan cu e fondo, manera e edificio di corte y tambe edificio di gobierno Cocolishi. Ademas por a tuma nota cu a desaroya un sistema nobo pa e cadena di stranheria na Dimas.
Prome minister a duna un danki na e fondo FDA tanto como Aruba Investment Bank (AIB) mirando cu e ehecuta e proyectonan di un manera profesional. Aunke awo ta mira un fin na e colaboracion aki entre paisnan den Reino, ainda mester determina den kico lo inverti e ultimo suma cu Hulanda a laga di su parti pa reforsa sistema hudicial y di siguridad na Aruba. “Danki na Hulanda pa inverti nan parti den proyectonan necesario pa Aruba”, prome minister a clausura.
Sr. Knops finalmente a declara cu aunke e cooperacion aki tabata un fructifero, hasta si den e tempo cu esaki tabata efectua e cooperacion entre Aruba y Hulanda tabata den su infancia, e ta mira cu nan ta prepara pa sigui coopera y cu su ministerio ya caba a presupuesta pa yuda Aruba cu aspectonan tecnico huridico y di maneho.
Esaki ta bay di acuerdo cu e rapport di evaluacion ‘Meerjarenprogramma’s Fondo Desaroyo Aruba’ traha pa SEO Economisch Onderzoek bou mandato di ministerio di asuntonan interno y di relacionnan di Reino di Hulanda y ministerio di finanzas den 2017. E rapport ta recomenda pa sigui cu un fondo similar na FDA, pero poniendo mas atencion na envolve usuarionan y particularmente inverti den legislacion, maneho y capital humano.
